Shymkentte Ulttyq ulan sarbazy qyzdy buzaqylardan aman alyp qaldy

ShYMKENT. QazAqparat – 13 aqpan kúni jyl saıynǵy demalysynda júrgen Ulttyq ulannyń 6506 áskerı bóliminiń áskerı qyzmetkeri qyzdy zorlaýdan qutqaryp qaldy, dep habarlaıdy QazAqparat QR Ulttyq ulan baspasóz qyzmetine silteme jasap.

Jibek Joly kóshesimen úıine qaıtyp bara jatqan qatardaǵy jaýynger Artem Kalashnıkov qyz balanyń kómek surap aıqaılaǵanyn estigen. Oqıǵa saǵat 00.40 shamasynda bolǵan. Áskerı qyzmetker oılanbastan qyzdyń daýysy shyqqan jaqqa júgirgen. Oqıǵa ornyna kelgen ol qyzdy zorlamaq bolǵan eki er adamdy ushyratqan. Artem olarmen qoıan-qoltyq urysqa túsip, bireýin ustap úlgergen, al ekinshi kúdikti qashyp ketken.

Oqıǵa ornyna 102 polıtsııa ekıpajy shaqyrylyp, kúdikti Shymkent qalasy Eńbekshi aýdanynyń AІІB-ne jetkizildi.

«Men beıtanys qyzdyń kómek suraǵanyn estı sala júgirip bardym. Meniń ornymda kez kelgen adam osylaı ister edi dep oılaımyn», – dep jaýap berdi Artem Kalashnıkov.

Kúdiktilerdi ustaý kezinde áskerı qyzmetker ózi de baıqamaı, qolyn jaraqattap alǵan. Degenmen polıtsııa kelgenge deıin er adamdy ustap turǵan.

Atalǵan is boıynsha qylmystyq is qozǵalyp, ekinshi kúdiktini ustaý jospary jarııalandy.