Shymkentte ulttyq sport túrlerinen A.Asqarov atyndaǵy halyqaralyq týrnır ótedi
ASTANA. QazAqparat - Memleket qaıratkeri, Sotsıalıstik Eńbek eri Asanbaı Asqarov atyndaǵy halyqaralyq týrnır bıyl Ońtústik óńirde HІІІ márte jalaýyn kótermekshi, dep habarlaıdy QazAqparat ulttyqsport.kz saıtyna silteme jasap.
Shymkent qalasynyń ortalyq atshabarynda qarashanyń 15-20 juldyzy aralyǵynda ótetin bul dástúrli jarysqa Qytaı, Ózbekstan, Qyrǵyzstan komandalary qatysady dep kútilýde.
Kórnekti memleket jáne qoǵam qaıratkeri Asanbaı Asqarovtyń týǵanyna bıyl 94 jyl. Aıtýly data qaıratkerdiń kezinde eńbek etken ońtústik óńirinde erekshe atalyp ótýde.
Ulttyq sport túrlerinen ótetin Asanbaı Asqarov atyndaǵy halyqaralyq týrnırdiń aýqymy da jyl saıyn keńeıip keledi. Alǵashqyda respýblıkalyq deńgeıde ǵana uıymdastyrylǵan týrnırde tek kókpar oıyny ǵana uıymdastyrylatyn. Keıinnen atalmysh jarys halyqaralyq dárejede uıymdastyryla bastady. 2011 jyldan bastap týrnırge aýdaryspaq saıysy engizildi.
Asanbaı Asqarov atyndaǵy halyqaralyq týrnırde endi ulttyq sporttyń jamby atý túrinen de báseke ótkizile bastaıdy. Kókpardan HІІІ márte, aýdaryspaqtan V márte, jamby atýdan tuńǵysh ret jalaý kóteretin bıylǵy týrnırge elimizdiń barlyq oblysynyń komandalary baq synamaqshy. Jarys qarashanyń 15 juldyzynda bastalady.
