Shymkentte ýlanyp qaza tapqan 3 jasar qyz: aspazdardan stafılokokk taıaqshasy tabyldy
Departament basshysynyń sózinshe, qaıtys bolǵan búldirshin men anasy tamaqtanǵan «Adana» dámhanasy men úılerine tapsyryspen aldyrǵan sýshıge qatysty saraptama qorytyndysy shyqqan. Oǵan sáıkes, dámhanadaǵy tamaqtardan zııandy taıaqshalar tabylmaǵan.
«Alaıda, sonda jumys isteıtin 15 qyzmetkerdiń beseýinen stafılakokk taıaqshalary tabyldy. Olardyń qatarynda 2 aspaz, 1 aspaz kómekshisi, 1 ydys jýýshy jáne kondıter bar. Al, sýshıdi tekserý kezinde synamalardan ótkir ishek aýrýynyń taıaqshalary shyqqan. Qalalyq juqpaly aýrýlar aýrýhanasyn áli tekserip jatyrmyz. Tekserý sharalary 13-21 qyrkúıek aralyǵynda júrgiziledi. Ázirge táýelsiz sarapshy men reanımatolog-ınfektsıonıst tartyp otyrmyz. Olardyń qorytyndylary men taldaý saraptamalaryn tekserý qorytyndysyna qosamyz»,- deıdi Nurbek Nyshanov.
Departament basshysy, sondaı-aq, aýrýhanaǵa jatqyzylǵan anasy men qyzynyń asqazan shaıyndysynan proteın mıkroby tabylǵanyn aıtady. Qazirgi tańda «Adana» dámhanasynyń qojaıyny men sýshıdi daıyndaǵan kásipkerlerge qatysty ákimshilik is qozǵalyp, aıyppul salynǵan. Olarǵa qatysty tekserý qorytyndylary quqyq qorǵaý organdaryna joldanyp otyr.
Esterińizge sala keteıik, 9 qyrkúıek kúni astan ýlanǵan 3 jasar búldirshin men anasy qalalyq juqpaly aýrýlar aýrýhanasyna túsken bolatyn. Qabyldaý bólimindegi dárigerler balanyń jaǵdaıy ortasha deńgeıde ekenin anyqtaǵan. Alaıda, búldirshinniń ájesi ony aýrýhanaǵa jatqyzýdan bas tartady. Anasy dárigerlerdiń baqylaýyna alynǵan. Dál sol kúni tús aýa naýqas balany ájesi qaıta ákelip, jatqyzǵan. Degenmen búldirshindi qutqarý múmkin bolmady.
Keıinnen olardyń qaladaǵy «Adana» dámhanasynda tamaqtanǵany jáne úılerine sýshıge tapsyrys berip, ony jegeni anyqtaldy. Qazirgi tańda Qoǵamdyq densaýlyq saqtaý komıtetiniń OQO boıynsha departamenti tarapynan atalǵan jaǵdaıǵa qatysty qyzmettik tekserý júrgizilip jatyr.