Shymkentte ulan sarbazdary tóbeleske baltamen shyqqan adamdy ustady

NUR-SULTAN. QazAqparat – Shymkentte Ulttyq ulan sarbazdary bireýge balta siltep, óltiremin dep qorqytqan jergilikti turǵyndy ustady, dep habarlaıdy QazAqparat vedomstvonyń baspasóz qyzmetine silteme jasap.

Oqıǵa Shymkent qalasynyń «Shyǵys» shaǵyn aýdanynda bolǵan. Patrýldik qyzmet kezinde áskerı jasaq eki adamnyń janjaldasyp jatqanyn baıqaıdy. Jandaryna jaqyndaǵan kezde bireýi ekinshisine baltamen umtylǵan.

«Biz patrýldik baǵytty aınalyp ótip, eki turǵynnyń qoǵamdyq tynyshtyqty buzyp jatqanyn baıqadyq. Janjal kúsheıip, qaqtyǵys qaıǵyly oqıǵaǵa ulasyp kete jazdady. Aralasýǵa týra keldi», - deıdi patrýldik toptyń bastyǵy, aǵa leıtenant Orazhan Orynbasar.

Tártip buzýshylar Eńbekshi aýdandyq polıtsııa bólimine jetkizilgen.