Shymkentte TJ mamandary ıisten ýlaný jaǵdaıyna qatysty túsinikteme berdi
ShYMKENT. QazAqparat - Shymkentte turǵyndardyń jappaı ıisten ýlaný jaıttaryna qatysty oblystyq tótenshe jaǵdaılar departamentiniń basshysy Nurbolat Derbisov túsinikteme berdi, dep habarlaıdy QazAqparat.
Onyń sózinshe, sońǵy úsh kúnde 7 adamnyń, onyń ishinde 4 balanyń ólimine turmystyq gaz quraldaryn paıdalaný kezindegi qaýipsizdik talaptarynyń saqtalmaýy sebep bolǵan.
Eki jaǵdaı boıynsha da oqıǵa ornyna kelgen gaz mamandary men tótenshe jaǵdaı qyzmetkerleri pesh qurylǵylary men syrtqa ıis shyǵaratyn murjalarynyń talapqa saı kelmeıtinin anyqtaǵan.
«Shymkent qalasy boıynsha sońǵy táýlikte gaz qurylǵylaryn ornatý kezindegi ereje buzýshylyqtarmen baılanysty qaıǵyly oqıǵalar jıilenip ketti. Taldaý kórsetkendeı, aqaýly pesh quraldaryn qoldaný, turmystyq gaz quraldaryn paıdalaný kezindegi qaýipsizdik talaptaryn buzý - ýlanýdyń basty sebepteri bolyp otyr. Ókinishke oraı, Oblystyq TJ departamentiniń ınjenerlik-ınspektorlyq quramymen ótkizilip jatqan profılaktıkalyq is-sharalarǵa qaramastan, qaıǵynyń sebepteri óte jıi adamı faktorlar bolýda»,- dedi Nurbolat Derbisov.
Departament bastyǵynyń aıtýynsha, óńirdiń tótenshe jaǵdaılar qyzmetkerleri jergilikti atqarýshy organdarymen birlesip, apta saıyn senbilikter ótkizip, aýlalardy aralaǵan. Turǵyndarmen kezdesip, túsindirý jumystaryn júrgizýde. Ásirese jylý berý kezeńinde túrli aktsııalar ótkizilip, peshpen jylytýdyń qaýiptiligi, ýly gazben ýlaný taqyryptarynda túsindirý sharalary ótkizilgen. Profılaktıkalyq jumystardy júrgizýge órt sóndirý jáne avarııalyq-qutqarý jumystary qyzmetiniń jeke quramy, «Nur Otan» partııasy janyndaǵy «Jas Otan» jastar qanatynyń ókilderi tartylǵan. Soǵan qaramastan oblys turǵyndary bul máselege jaýapkershilik tanytpaı otyr. Sonyń saldarynan óńirde jyl basynan beri ýly gazdan 54 adam zardap shegip, 18 adam qaıtys bolǵan. Onyń ishinde 6 bala bar. Osyǵan oraı tótenshe jaǵdaılar qyzmetkerleri turǵyndarǵa taǵy da eskertý jasady. 
«Qurmetti Ońtústik Qazaqstan oblysynyń turǵyndary! Sizderge turmystyq gazdy paıdalaný yńǵaıly, biraq, qaýipti. Tótenshe jaǵdaılar departamenti Sizderge gaz quraldaryn qaýipsiz qoldaný erejelerine muqııat bolý qajettigin esterińizge salady. Esterińizde bolsyn, turmysta qoldanylatyn gaz órtke qaýipti jáne jarylýy múmkin. Qoldanystaǵy gaz quraldaryn qaýipsiz paıdalanýǵa jáne ony tıisti jaǵdaıda ustaýǵa úı ıesi jaýapty bolady», delingen eskertýde.
