Shymkentte tyıym salynǵan jerlerde shomylǵandar zań boıynsha jazaǵa tartylady
Tótenshe jaǵdaılar qyzmeti basshylyǵynyń aıtýynsha, búginde jedel-qutqarý jasaǵynyń 20 qyzmetkeri sýǵa shomylý maýsymynyń sońyna deıin qyzmet atqarýdyń kúsheıtilgen rejımine aýystyrylǵan. Bul baǵyttaǵy jumystardy belsendirek júrgizý maqsatynda qala ákimdigi arnaıy qaýly daıyndap, is-sharalar jospary bekitilgen. Úgit-nasıhat jumystaryna erikti stýdentterdi, jergilikti polıtsııa qyzmetkerleri tartylady. Shomylý maýsymyn qaýipsiz ótkizý maqsatynda arnaıy brıfıng uıymdastyrǵandar aǵymdaǵy jyldyń 4 aıynda qala aýmaǵynda sýdaǵy jazataıym oqıǵalar tirkelmegenin jetkizdi.
«Statıstıkaǵa júginsek, ótken jyly osy merzimde 4 adam sýǵa ketip, qaıtys bolǵan. Onyń ekeýi - shomylý bekitilmegen jerlerde ishimdik iship shomylǵan eresek adamdar. Al eki jas bala ata-anasynyń qaraýynsyz qalyp, aryqqa túsip ketken»,- deıdi qalalyq Tótenshe jaǵdaılar departamenti bastyǵynyń orynbasary, polkovnık Erǵalı Bahaev.
Departament basshysynyń málimetinshe, qaıǵyly oqıǵalardyń aldyn alý maqsatynda qala ákiminiń orynbasary Nursadyq Ergeshbekulymen tótenshe jaǵdaılar komıssııasy qurylǵan. Oǵan naqty tapsyrmalar qoıylyp, qaladaǵy shomylý oryndarymen kelisimsharttar jasalǵan. ıAǵnı, áleýmettik jaǵdaıy tómen, az qamtylǵan otbasylardyń balalaryn aptasyna bir ret tegin shomyldyrý múmkindigi qarastyrylýda. Budan bólek Sport jáne deneshynyqtyrý basqarmasy men tótenshe jaǵdaılar qyzmetiniń mamandary birlesip, qala aýmaǵyndaǵy shomylý oryndarynda balalardy shomylýǵa tegin úıretý kózdelip otyr.
«Eń bastysy, qazirgi tańda qala turǵyndaryna BAQ arqyly úgit-nasıhat jumystary júrgizilýde. Megapolıstiń barlyq mektepterine bir ýaqytta ınteraktıvti sabaqtar ótkizildi. Adamnyń ómiri, ásirese jas balalardyń ómiri basty orynda. Sondyqtan qarapaıym erejelerdi saqtasa, ol degenimiz naqty belgilengen, ruqsat etilgen jerlerde shomylý kerek. Ata-analarǵa aıtarymyz, balalaryn qaraýsyz qaldyrmasyn. Al, eresekter sýǵa túserde ishimdik ishpese degen eskertý aıtqymyz keledi», - dedi Erǵalı Bahaev.