Shymkentte túzeý mekemesindegi sottalýshylar kúnine 2,5 myńǵa jýyq bólke nan pisiredi
Shymkent qalasy Qylmystyq atqarý júıesi departementiniń baspasóz qyzmetiniń ókili Jazıra Áýeshannyń aqparatyna sáıkes, qala boıynsha QAJ departamentine qarasty orta jáne aýyr qylmys jasaǵany úshin sottalǵan azamattar jazasyn óteıtin ICh 167/3 mekemesinde naýbaıhana 16 jyldan beri jumys isteıdi. Munda pisken nandardy qaladaǵy qalǵan 4 túzeý mekemesine taratady.
« Eńbek-Shymkent « fılıalynyń 31-telim sheberi Nursultan Sádibek 7 jyldan beri sottalǵan azammattarmen jumys jasap kele jatqanyn aıtty. «Sonymen qatar naýbaıhanada 12 adam 2 aýysymmen jumys jasap,táýligine 5 mekemege 2100-2500 bólke nan jetkizip beremiz. Aılyq jalaqy mólsheri 42 500 teńge, oǵan qosa atqarylǵan jumystaryna qaraı taǵy da ústeme aqsha beriledi» , - deıdi naýbaıhana meńgerýshisi.
Sottalǵandardyń barlyǵy jumys berýshilermen kelisimshartqa otyrǵan. Keıbiri tapqan paıdasyn jaqyndaryna jiberip otyrady.
ICh 167/3 mekemesinde eń jas jazasyn óteýshi 19 jastaǵy R. Qyryqbaı da qazirgi tańda naýbaıhana isiniń sheberi bolǵan. 7 jylǵa bas bostandyǵynan aıyrylǵan ol balalyqpen qatelikke urynǵanyn, soǵan oraı sot úkiminiń taǵaıyndaǵan jazasyn ótep kele jatqanyn aıtty. «Bul mekeme maǵan ómirde qajet bolatyn kóptegen dúnıeni úıretti dep nyq senimmen aıta alamyn. Búgingi kúnde adal eńbegimniń arqasynda nan jabýdyń qyr-syryn bilip qaldym. Bir qap unnan qansha nan alýǵa bolatynyn, jáne oǵan qosylatyn qospalardyń mólsherin ( sý , ashytqy,tuz) degen sııaqty. Eńbegim de óteýsiz qalyp jatqan joq. Aıyna 40000-45000 teńge arasynda jalaqy alamyn. Osy naýbaıhananyń arqasynda ata-anama, úı ishime kómektesemin, mekemeniń dúkeninen ózime qajetti zattardy da alyp turamyn.
Men osy naýbaıhanada istep júrgen isimniń tabysty ári jemisti ekenin túsindim. Adamdar kıim kımese de, nan alady. Osy jerden aıybymdy ótep shyqqan soń, ýaqytymdy bosqa ótkizbeı, qoǵamǵa, qorshaǵan ortaǵa óz úlesimdi qosqym keledi. Jáne de ózime « Eńbektiń nany tátti « degen ustanymdy serik ettim», - deıdi ol.
