Shymkentte TURKSOY uıymyna múshe elder fotosýretshileriniń kórmesi uıymdastyryldy
Úsh kúnge sozylǵan kezdesýde fotoóner sheberleri Túrkistan, Kentaý qalalary, Otyrar, Saıram, Shardara, Qazyǵurt, Tóle bı, Sozaq, Báıdibek, Túlkibas aýdandaryndaǵy tarıhı oryndar men demalys oryndarymen tanysyp, sýretke túsirgen bolatyn.
Kórmeniń maqsaty - elimizdiń tarıhı-mádenı muralaryn, sáýlettik eskertkishterin, salt-dástúrin, ádet-ǵurpyn, oblysymyzdyń tarıhı oryndary men ásem tabıǵatyn fotosýret arqyly nasıhattaý boldy.
Kórmeniń ashylý saltanatynda sóz alǵan TURKSOY halyqaralyq uıymynyń ókili Shahnoza Býrhanıdınova bıylǵy is-sharalardyń ótýine uıytqy bolyp otyrǵan Ońtústik Qazaqstan oblysynyń ákimdigine rızashylyǵyn bildirdi. «Sizderge alǵasymyz sheksiz. Ońtústik Qazaqstan oblysy negizi bir, tilegi ortaq, túrki jurtynyń halyqtar arasyndaǵy dostyq baılanystaryn ornatýǵa, nyǵaıtýǵa súbeli úles qostyńyzdar. Sondaı-aq, búgingi is-sharaǵa qatysyp otyrǵan fotosýretshilerge shyǵarmashylyq tabys tileımin»,- dedi Shahnoza Býrhanıdınova.
Óz kezeginde kórmege arnaıy qatysqan oblys ákimi Janseıit Túımebaev ta aýqymdy sharanyń mańyzdylyǵyna toqtalyp, fotosýretshilerdi marapattady. «Mine, búgin úzdik fotoóner týyndylarynan jasaqtalǵan kórmege jınalyp otyrmyz. Aldaǵy ýaqytta osy týyndylardyń fotoalbomy shyǵarylyp, halyqqa keńinen nasıhattalatyn bolady. Jalpy fotoóner degenimiz - fotosýretti negizgi oıdy bildirý quraly retinde qoldanatyn ónerdiń erekshe túri. Qoǵam shyndyǵyn tarıhta qaldyratyn fotosýretshiler. Sonymen qatar, fotoóner - jýrnalıstıkanyń ushqyr salasy. Ol - qasqaǵym sáttiń shejiresi», - dedi Janseıit Qanseıituly.
Aıta keteıik, buǵan deıin túrki áleminiń «Naýryz» halyqaralyq aqyndar aıtysy, «Burań bel» bı jáne «Kúlki jármeńkesi» festıvalderi uıymdastyrylǵan bolatyn. Atalǵan is-sharalar Halyqaralyq teatr festıvali jáne XIV-shi TÚRKSOI fotosýretshileriniń kezdesýimen jalǵasyn tapty. 
