Shymkentte túrik aqyny ıÝnýs Emre atyndaǵy saıabaqtyń irgetasy qalandy
ASTANA. QazAqparat - Naýryz merekesi qarsańynda Shymkent qalasyndaǵy ákimshilik iskerlik ortalyǵy mańynda «Shatqal» baǵdarlamasy aıasynda ıÝnýs Emre atyndaǵy saıabaqtyń irgetasy qalandy. Sharanyń ashylý saltanatyna Ońtústik Qazaqstan oblysynyń ákimi Janseıit Túımebaev arnaıy qatysyp, saıabaqtyń alǵashqy shyrshasyn otyrǵyzdy, dep habarlaıdy óńir basshysynyń baspasóz qyzmeti.
ıÝnýs Emre saıabaǵynyń jalpy aýmaǵy 25 gektardy quraıdy. Aldaǵy ýaqytta munda 4 myń túp aǵash kóshetteri otyrǵyzylyp, 4 balalar alańshasy salynbaq. Budan bólek, shahmat jáne doıby alańy, qashyqtyǵy 1 shaqyrym bolatyn velojol tóselmek. Sondaı-aq 1 amfıteatr, 8 sýburqaq, 3 kafe men jazǵy demalys oryndary, sporttyq jattyǵý alańdary boı kóteretin bolady.
«Búgin biz «Shatqal» baǵdarlamasy aıasyndaǵy úshinshi saıabaqtyń irgetasyn qaladyq. Bul Naýryz merekesi qarsańynda qala turǵyndaryna tartý retinde usynylyp otyr. Aldaǵy ýaqytta dál osyndaı 14 saıabaqtyń irgetasy qalanatyn bolady. Endi ashylatyn saıabaqtarǵa shyǵystyń Farabı, Ferdaýsı, Fızýlı syndy ataqty ǵulamalarynyń esimderin berýdi oılastyryp otyrmyz. Ondaǵy maqsat - saıabaqtardy halyqtyń tek demalys orny emes, rýhanı lázzat alyp, serpiletin mádenı mekenge aınaldyrý» , - dedi Janseıit Qanseıituly.
Saıabaqtarda ataqty aqyn, ǵulamalardyń eńbekteri tasqa qashap jazylyp, óskeleń urpaqty rýhanı tárbıeleýge septigin tıgizbek. Búgin alǵashqy tal-daraǵy otyrǵyzylǵan saıabaqqa túrik aqyny, fılosof, aǵartýshy ıÝnýs Emre esiminiń berilýi de tegin emes. Bıyl «Túrkistan qalasy - túrki áleminiń mádenı astanasy» mártebesin ıelenip, barsha baýyrlas ulttardyń yntymaǵy uıyǵan ordasyna aınalyp otyr. Onyń ústine, ıÝnýs Emre Qoja Ahmet Iassaýıdiń jolyn qýǵan túrik aqyny. Aqyn bar ǵumyryn ıslam qaǵıdalaryn Iassaýı jolymen halyqqa túsindirý úshin arnaǵan.
Atalǵan demalys oryndarynyń óńir turǵyndarynyń taza aýada tynyǵyp, demalýy úshin jasalyp jatqanyn aıtqan ákim onyń tazalyǵy men damýyna birlese kúsh salý qajettigin de atap ótti.
Aıta keteıik, oblys ákiminiń bastamasymen qolǵa alynǵan tyń joba boıynsha aldaǵy ýaqytta qalada 600 gektar shatqaldy jerdi demalys oryndaryna aınaldyrý josparlanyp otyr. 
