Shymkentte turǵyndardyń biriniń 2 mln teńgesin aldap alyp ketken alaıaq ustaldy
ShYMKENT. QazAqparat - Shymkentte tender «alyp beremin» degen jeleýmen turǵyndardyń biriniń 2 mln 330 myń teńgesin aldap alyp ketken alaıaq ustaldy, dep habarlaıdy QazAqparat HAA tilshisi.
Jábirlenýshi Shymkent qalasyna qarasty Qarataý aýdandyq polıtsııa bólimine aryzdanyp, 2015 jyly tanysyna aldanyp qalǵanyn aıtqan. Aryzynda ol 1970 jyly týǵan tanysynyń tender «alyp beremin» dep ózinen 2 mıllıon 330 myń teńge alǵanyn, alaıda sodan beri ne tenderden, ne aqshadan habar joq ekendigin aıtqan.
Osydan keıin polıtseıler jedel-izdestirý sharalaryn júrgizip, kúdiktini qolǵa túsirgen. Onyń buǵan deıin de osy tektes qylmys boıynsha isti bolǵany anyqtaldy. Qazirgi tańda alaıaqtyń ústinen Qylmystyq kodekstiń 190-baby «Alaıaqtyq» áreketi boıynsha qylmystyq is qozǵalyp, tergeý amaldary júrgizilip jatyr. Kúdikti qamaýǵa alynyp, odan jaýap alynýda.
