Shymkentte turǵyn úılerdiń baǵasy birshama arzandaǵan
ShYMKENT. QazAqparat - Shymkentte turǵyn úılerdiń baǵasy arzandap ketken. Buǵan jurttyń áleýmettik jaǵdaıy sebep bolyp otyr. Jergilikti rıeltorlardyń pikiri osyǵan saıady.
Sala mamandarynyń sózinshe, qazir qarapaıym halyqtyń qolynda qomaqty aqsha joq, dep habarlaıdy QazAqparat HAA tilshisi.
Turǵyn úı naryǵynda 15 jyldaı tájirıbesi bar Sáýle Asylbekovanyń sózinshe, baspanaly bolǵysy keletinder kóbinese arzan baǵaǵa izdeıdi. Buǵan deıin jańa úılerden de joǵary baǵalanǵan páterler birazdan beri ótpeı qalsa kerek, qojaıyndary qunyn tómendetip jatyr.
«Byltyr páterler de, jekemenshik úıler de dollarmen satylatyn. Bıyl baǵasy teńgemen belgilenedi. Al, baǵasyna kelsek, ótken jylmen salystyrǵanda áldeqaıda arzandaǵan. Ásirese, buryn salynǵan kópqabatty, onyń ishinde 103-105 serııaly úılerdiń quny tómendep otyr. Internette sarapshylar 1 paıyzǵa arzandaǵan deıdi, ol shyndyqqa janaspaıdy. Bizdiń esebimizshe, 10-15 paıyzǵa túsken. Máselen qazir bir bólmeli páterlerdi 4,8 - 5,5 mln teńgeniń arasynda alýǵa bolady. Ótken jyldary bul baǵaǵa tek jataqhana alýǵa bolatyn», - deıdi rıeltor S.Asylbekova.
Mamandardyń sózine qaraǵanda, qazir jurt negizinen bir jáne eki bólmege umtylady. Ári eki bólmeli páterler de baǵasy qoljetimdi bolyp qalǵan. Máselen, ótken jyldary 40 myń dollar turatyn baspanany qazir 9 - 14 mln teńgeniń aralyǵynda alýǵa bolady.
«Taýmır» rıeltorlyk agenttiginde isteıtin Álııa Dınasılovanyń aıtýynsha, aldyńǵy jyldarmen salystyrǵanda, bıyl saýda joq. Alýshy az. Halyqta naqty aqsha joq. Kóbisi almastyrady. Keıbireýler bankten alǵan ıpotekasyn tóleı almaǵandyqtan, arzanǵa berip, basqa úıge aýystyryp jatyr eken.
«Jekemenshik jer úıler ótken jyldary 200 myń dollar tursa, bıyl sol úılerdi 80-85 myń dollarǵa satýda. Óıtkeni naryq túsip jatyr. Qazir tabys azaıyp ketti. Páter jaldaýshylar da arzan úılerge júgiredi. Buryndary klıentter komfort izdeıtin. Qazir baǵasy arzanyn suraıdy. Máselen, ótken jyly 80-90 myń teńgege beriletin páterler bıyl 50-55 myń teńgege berilýde. Alys jerlerden kelgender bolmasa, jergilikti halyqtyń qaltasy kótermeı qalǵan. Kóbisi 30-40 myń teńge turatyn páter izdeıdi»,- deıdi Álııa Dınasılova.
Deldaldar jańadan salynǵan úılerden páter alýǵa jurttyń shamasy kelmeıtinin aıtady. Óıtkeni baǵasy naryqtan áldeqaıda qymbat. Ásirese kirpishten salynǵan kópqabatty úıler sharyqtap tur. Jeńil qurastyrylǵan úılerdiń alańy úlken dep qyzyqqandar, kóbinde banktiń kómegine júginedi. Biraq ondaǵy paıyzdyq mólsherlemeler de alýshylardyń qaltasyna aýyr soǵyp tur.
Jurttyń negizgi úmiti «Turǵyn úı qurylys jınaq bankine» aqsha salyp, tómen paıyzben ıpotekaǵa qoljetimdi baspana alý bolyp tur.
«Ekinshi deńgeıli úılerdiń ishinde bizdiń talabymyz boıynsha qurylysy 50 jyldan aspaýy kerek. Tek oblys ortalyǵy emes, oblys aýmaǵyndaǵy qala aýdandardan da úı alýǵa bolady. Sondaı-aq 2016 jyldan bastap balshyqtan jasalǵan (saman) úılerdi de alýǵa ruqsat berilgen. Ol úshin bank tarapynan nesıe beriledi. Tek klıent alǵashqy somasyn bankke quıý kerek»,- deıdi «Turǵyn úı qurylys jınaq banki» OQOF tóraǵasynyń orynbasary Aqylbek Qospanov.
Aıta keteıik, búginde Shymkent qalasynda úsh birdeı jańa turǵyn úı alaby boı túzep otyr. Sáýletti úılerdiń barlyǵy bir stılde salynyp, úzdik sáýlet úlgisine negizdelmek. Kópqabatty turǵyn úı qurylysy «Nurly jol» baǵdarlamasy aıasynda aǵymdaǵy jyly bastalady.
Jalpy oblys aýmaǵynda ótken jyly 500 myń sharshy metrden astam úı halyqtyń paıdalanýyna berilgen. Ol páter kezegi men baspanaǵa zárý otbasylarǵa tabys etildi. Óńirdegi turǵyn úı máselesin túbegeıli sheshý maqsatynda 5 baǵytta jumys júrgizilip jatyr. Sol arqyly 2021 jyly qurylys qarqynyn jylyna 1 mıllıon sharshy metrge jetkizý josparda bar.
«Turǵyn úımen qamtamasyz etý baǵytynda 2017 jyly Ońtústik Qazaqstan oblysynda 153 turǵyn úı qurylysy júrgizilip jatyr. Ol 7091 páterdi quraıdy. Sonyń 111 úıi nemese 5989 páter bıylǵy jyly tapsyrylady»,- dedi oblystyq qurylys basqarmasynyń basshysy Salyhan Polatov.
