Shymkentte turǵyn úı kezeginde 5 myńǵa tarta kópbalaly otbasy tur
ShYMKENT. QazAqparat – Elimizdiń úshinshi megapolısinde baspana máslesi kún tártibinen túsken emes. Qala ákimi Erlan Aıtahanov qazirgi tańda turǵyn úı kezeginde 134 myń, jerdiń kezeginde 119 myńnan astam azamat tirkelgenin aıtady, dep habarlaıdy QazAqparat tilshisi.
Qala basshysynyń sózinshe, baspana kezeginde turǵandardyń qatarynda kópbalaly 5 myń otbasy bar.
«Turǵyn úı qurylysynda, qaıtarymdy kredıttik úılerge basymdyq beriletin bolady. Osy kúnge deıin kredıttik turǵyn úıdi satýdan túsken qarjy basqa maqsattarǵa jumsalyp kelse, aldaǵy ýaqytta tek turǵyn úı qurylysyna qaıta jumsalatyn bolady. Bul da, turǵyn úı kóleminiń artýyna óz áserin tıgizedi. Aǵymdaǵy jyly qalada 2 847 páterli 53 turǵyn úı paıdalanýǵa berildi. Onyń ishinde jumysshy jastarǵa 904 páter, kópbalalary otbasylarǵa 450 páter, halyqtyń álsiz toptaryna 252 páter. Kelesi jyly «Turan» móltekaýdanynda aýmaǵy 194 ga jerge 4 496 páterli 68 kóp qabatty turǵyn úıdiń qurylysy bastalady»,- dedi Erlan Aıtahanov.
Shahar basshysynyń aıtýynsha, turǵyn úı qurylysynyń kólemin arttyrý úshin SPK «Shymkent» arqyly 5 493 páterli 75 turǵyn úı salynady. Onyń ishinde 2020 jyly 1 016 páterli 24 turǵyn úı paıdalanýǵa beriledi dep josparlanǵan.
