Shymkentte tún jarymynda jarapazan aıtyp júrgen 14 bala anyqtaldy
Shymkent qalalyq PD ıývenaldy polıtsııa qyzmetkerleri kámeletke tolmaǵandar arasyndaǵy jáne olarǵa qarsy jasalatyn quqyq buzýshylyqtardyń aldyn alý maqsatynda «Túngi qaladaǵy balalar» profılaktıkalyq is-sharasyn júrgizip jatyr.
Nátıjesinde, qala aýmaǵynda júrgizilgen reıd barysynda 44 ákimshilik quqyq buzýshylyq tirkelgen.
Atap aıtqanda, jarapazan aıtyp júrgen 14 jasóspirim, túngi ýaqytta oıyn-saýyq oryndarynda bolǵan eki jasóspirim, zańdy ókilinsiz turǵyn úıden tys jerlerde bolǵan 27 bala anyqtaldy.
Sondaı-aq, kámeletke tolmaǵandardyń oıyn-saýyq oryndarynda bolýyna jol bergen bir mekemege qatysty ákimshilik hattama toltyrylǵan.
Atalǵan jaıt boıynsha túngi ýaqytta mektep oqýshylarynyń qadaǵalaýsyz júrýiniń aldyn alý maqsatynda Shymkent qalasynyń bilim basqarmasyna usynys joldanyp, balalar men ata-analar arasynda túsindirme jumystary júrgizildi.
– Biz mundaı profılaktıkalyq is-sharalardy únemi júrgizip otyramyz. Ondaǵy maqsat – qala turǵyndarynyń qaýipsizdigi men tynyshtyǵyn qamtamasyz etip, qylmystyq jaıttardy boldyrmaý jáne onyń aldyn alý. Osy tusta, qurmetti azamattar zań bárimizge ortaq ekenin eskertemin. Óz balalaryńyzdyń tártibi men qaýipsizdigi úshin jaýapty ekenderińizdi nazarda ustańyzdar, – dedi Shymkent qalasy PD bastyǵy Qaırat Dálbekov.
