Shymkentte tún ishinde urlanǵan qyzdy úılený úshin alyp qashqan bolyp shyqty
Qalalyq PD baspasóz qyzmetiniń málimetinshe, qyzdy alyp qashqandar men boıjetken polıtsııaǵa jetkizildi. Krımınaldyq polıtsııa basqarmasynyń qyzmetkerleri jedel-izdestirý is-sharalaryn júrgizý barysynda qyzdy alyp qashqandardyń jáne qyzdyń kim ekenin anyqtap, olardy Túrkistan oblysynyń aýmaǵynan Polıtsııa basqarmasyna alyp kelgen. Tekserý barysynda er adam úılený maqsatynda eki dosynyń kómegimen qyzdy alyp qashqany belgili boldy. Olardyń barlyǵy Túrkistan oblysynyń turǵyndary.
«Sol túni meni 18 móltek aýdanda syrttaı tanıtyn er azamat maǵan úılený maqsatynda óziniń dostarymen avtokólikke kúshtep otyrǵyzyp, úıine alyp ketti. Osy kúnge deıin men sol er adamnyń úıinde boldym. Maǵan zorlyq-zombylyq is-áreketter jasalǵan joq. Meniń jaǵdaıym jaqsy», - dedi jábirlenýshi azamatsha.
Eske salsaq, 29 naýryzda áleýmettik jelide qaladaǵy kópqabatty úılerdiń biriniń aýlasynda belgisiz tulǵalar qyzdy avtokólikke kúshtep otyrǵyzyp alyp ketkendigi týraly beınejazba taraǵan bolatyn. Sol kúni atalǵan derek boıynsha QR QK-niń 126-babynyń 2-bóliginiń 1- tarmaǵymen (bas bostandyǵynan zańsyz aıyrý) sotqa deıingi tergep-tekserý amaldary júrgizildi. Qazirgi ýaqytta tergeý amaldary jalǵasýda. Alyp qashýǵa qatysqan barlyq qatysýshylar eshqaıda ketpeý týraly qolhatqa qol qoıdy. Al, avtokólikteri aıypturaqqa qoıyldy.