Shymkentte transplantatsııalyq ota jasaý isi toqtamaıdy
Áleýmettik jelide Shymkent qalalyq №1 klınıkalyq aýrýhanasynyń bas dárigeri Abylaı Donbaıdyń transplantatsııalyq ota jasamaıtyndyǵy jóninde málimdemesi tarady.
«Kezegin kútip júrgen transplantatsııa jasatamyn degen qarapaıym qazaqtyń adamdarynan obal boldy. Kesheden bastap men qalalyq aýrýhanada jumys jasamaımyn. Kezekte turǵan naýqastarǵa aıttym. Shetelge ketip qalǵan dárigerlerdi endi túsindim. Bizdiń medıtsınamyzdyń nege damymaıtynyn da túsindim» - dep jazdy ol jelidegi paraqshasynda.
Atalǵan jaǵdaıǵa baılanysty resmı pikir bildirgen Shymkent qalasy densaýlyq saqtaý basqarmasy bıylǵy jyldyń 10 shildesinen bastap A.Donbaımen eńbek sharty toqtalǵanyn málimdedi. Sondaı-aq, qaladaǵy medıtsınalyq uıymdarda aǵza almastyrý otasyn jasaıtyn dárigerler jetkilikti ekendigin aıtyp, transplantatsııalyq ota toqtamaıtyndyǵyn jetkizdi.
«Eńbek shartynyń toqtatylýynyń sebebi basqarma basshysynyń mindetin ýaqytsha atqarýshy B.Abdýllaevtyń atyna basqarmanyń salalyq bólimderi tarapynan aýrýhananyń bas dárigeri A.Donbaıǵa qatysty birqatar kemshilikterge jol berilgendigi kórsetilip, 5 qyzmettik hat túsken.
A. Donbaı ózi basqarǵan aýrýhananyń esep shotynan 3 481,2 myń teńge zańsyz ózine aılyq jalaqy retinde aýdarǵan. Bul jaǵdaı Departament tarapynan júrgizilgen tekserý barysynda anyqtalǵan. Buǵan qosa A. Donbaı aýrýhana orynbasarlary men bas býhgalterine negizgiz úlken somada qarjylaı syıaqy berip otyrǵan. Sondaı-aq «A.N. Syzǵanov atyndaǵy ulttyq ǵylymı hırýrgııa ortalyǵy» AQ-nyń Gepatopankreatobılıarlyq hırýrgııa jáne baýyr transplantantsııasy bólimshesiniń meńgerýshisi M.Doshanovtyń qorytyndysyna baılanysty A. Donbaı basqarǵan aýrýhanada oryndalǵan baýyr transplantatsııalarynyń nátıjelerin taldaý barysynda medıtsınalyq kómekterdiń sapasyzdyǵy boıynsha birqatar kemshilikter oryn alyp, 2022 jyly №1 qalalyq klınıkalyq aýrýhanasynda transplantatsııasy jasalǵan 4 naýqas qaıtys boldy. Basqarma tarapynan burynǵy bas dárigerge qysym kórsetilmegen. Muny Abylaı Donbaıdyń ózi moıyndap, Memleket basshysyna joldaǵan úndeýiniń negizsiz ekenin alǵa tartyp, óz tarapynan túsinbeýshilik ketkeni týrasynda áleýmettik jelige beınejazba jarııalaǵan. paraqshasynda jarııalaǵan» - delingen resmı jaýapta.
Sonymen qatar, basqarmanyń resmı jaýabynda aýrýhanada ýákiletti organdar tarapynan tıisti tekserýler júrgizilip, birqatar qarjylyq zańbuzýshylyqtar oryn alǵandyǵy anyqtalǵandyǵyn jazylǵan. Sondaı-aq, kadrlyq máselede de biraz kemshilikter bolǵandyǵyn aıtqan.
«Kadr máselesine toqtala ótsek, aýrýhananyń bas dárigeri A.Donbaı bilikti tájirıbesi mol túrli sala dárigerleriniń Qazaqstan Respýblıkasynyń basqa aýmaqtarymen qosa kórshiles Túrkistan oblysynyń medıtsınalyq uıymdaryna májbúrli túrde ketýine jol bergen. Nátıjesinde aýrýhanada medıtsınalyq kómek kórsetý sapasy kúrt tómendegen. 2023 jyldyń basynan, 44 medıtsına qyzmetkerin jumystan bosatqan. A. Donbaı basqaryp otyrǵan aýrýhanaǵa qatysty Qazaqstan Respýblıkasynyń Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetiniń Shymkent qalasy boıynsha departamenti 2023 jyldyń 5 aıynda aýrýhanada kórsetiletin medıtsınalyq kómek sapasy boıynsha 5 tekserý júrgizgen. Tekserý qortyndylaryna sáıkes 2 negizdelgen aryz jáne 3 ishinara negizdelgen aryz anyqtaldy» - dep kórsetilgen.
Sonymen qatar, Shymkent qalalyq densaýlyq saqtaý basqarmasy A. Donbaı bas dáriger qyzmetinen bosatylǵanymen, Shymkent qalalyq densaýlyq saqtaý basqarmasy tarapynan transplantatsııalyq ota jasaýǵa eshqandaı shekteý joq ekenin málimdeıdi.
«Qaladaǵy medıtsınalyq uıymdarda aǵza almastyrý otasyn jasaıtyn dárigerler jetkilikti. Qajettilikke baılanysty naýqastarǵa transplantatsııalyq ota jasalady»- delingen basqarma tarapynan taratylǵan aqparatta.