Shymkentte traktor men jeńil kólik soqtyǵysyp, tórt adam qaza tapty
Jol-kólik oqıǵasy Shymkenttiń shyǵa berisindegi Aqtas aýylynyń tusynda bolǵan. Aýdı jeńil kóligi joǵary jyldamdyqta kele jatyp, traktordyń tirkemesine kirip ketken. Oqıǵa ornynda jeńil kóliktiń úsh jolaýshysy kóz jumdy. Olardyń biri 9 jastaǵy jasóspirim ekeni belgili boldy. Al, jaraqaty óte aýyr bolǵan kólik júrgizýshisi aýrýhana tóseginde jan tásilim etken. Sondaı-aq, traktorda bolǵan eki adam men Aýdıdiń eki jolaýshysy qazir aýrýhanada jatyr. Jol apatynan aýyr jaraqattanǵan bir áıel es-tússiz jansaqtaý bólimine jatqyzyldy. Dárigerler onyń jaǵdaıyn aýyr dep baǵalaýda.
«Aýrýhanaǵa jetkizilgen 29 jastaǵy qyz balaǵa: jambas súıeginiń synýy, jabyq bas mı jaraqaty, bas mıynyń shaıqalýy, keýdesiniń jaraqattanýy dıagnozy qoıylǵan. Onyń da jaǵdaıy aýyr. Taǵy bir naýqas - 45 jastaǵy er adam. Onyń kelip túskendegi jaǵdaıy ortasha aýyrlyqta. Jambasy synǵan, jaraqat bólimine jatqyzyldy. Úshinshi naýqas 26 jastaǵy jigit, bizge túskendegi jaǵdaıy aýyr bolǵan. Muryn súıeginiń synýy, bas mıynyń jabyq jaraqaty, bas mıynyń shaıqalýy dıagnozy qoıylǵan. Qazirgi tańda jaǵdaıy ortasha aýyrlyqta. Tórtinshi naýqas - 40 jas shamasyndaǵy er kisi. Onyń jaǵdaıy kanaǵattanarlyq. Alǵashqy kómek kórsetilgen soń, ambýlatorııalyq em qabyldaýǵa jiberildi»,- deıdi Shymkent qalalyq klınıkalyq aýrýhananyń bólim meńgerýshisi Ótkirjan Moldahan.
Qazir tórt adam qaza tapqan jol-kólik oqıǵasynyń sebep-saldary anyqtalýda. Polıtsııa departamentiniń anyqtaýshylary tarapynan tergeý amaldary júrgizilip, birqatar saraptamalar taǵaıyndalǵan. Aldyn ala boljam boıynsha jeńil kóliktiń júrgizýshisi taksı qyzmetin kórsetip kelgen kórinedi.