Shymkentte tozyǵy jetken kópir aqyry buzyldy
ShYMKENT. QazAqparat - Shymkentte qorǵasyn zaýyty aýmaǵyndaǵy tozyǵy jetken kópir búgin buzyldy. Temirjol mamandary salmaǵy 50 tonna bolatyn qos beton plıtany arnaıy tehnıkanyń kómegimen alyp tastady, dep habarlaıdy QazAqparat tilshisi.
Qorǵasyn zaýyty aýmaǵyndaǵy qaraýsyz qalǵan kópirdi bireýler shetinen úgitip, ishindegi temir tireýlerin kesip áketken bolatyn. Sóıtip, apatty jaǵdaıǵa jetkizgen. Saldarynan kópir astymen ótetin 60-tan astam júk jáne jolaýshylar poıyzyna qaýip týǵan edi. Osy máselege oraı «Qazaqstan temirjoly» AQ men Shymkent qalasynyń ákimdigi birlesip, kópirdi ornynan alyp tastady. Montajdaý jumystary alty saǵattaı ýaqytta júrgizildi. Barlyq shyǵyndy "Qazaqstan temirjoly" ulttyq kompanııasy kóterip otyr.
Aıta keteıik, aspaly kópir ótken ǵasyrdyń 70-shi jyldary qorǵasyn zaýytynyń jumysshylaryna arnap salynǵan. Óıtkeni kásiporyn eńbekkerleri temirjoldan ótetin bolǵan. Keıin zaýyt jumysy toqtap qalǵan soń, kópir qaraýsyz qaldy. Keıinnen qala ákimdigi men tótenshe jaǵdaılar qyzmeti zaýyt aýmaǵyndaǵy qulaýǵa shaq qalǵan munara men tozyǵy jetken aspaly kópirdi apatty dep tanyp, ony buzý týraly sheshim qabyldaǵan bolatyn.
