Shymkentte toı jasaýyn qoımaǵan 19 kafe-restoran sot sheshimimen jabyldy

ShYMKENT. QazAqparat - Shymkentte birneshe ret karantın talaptaryn buzǵan 19 nysannyń jumysy toqtatyldy, dep habarlaıdy QazAqparat.

Qazirgi tańda Shymkent qalasynda koronavırýs indeti keń taralýyna qaramastan, oıyn-saýyq (kafe, restoran, londj-bar, karaoke-bar) oryndary jáne toıhanalar karantındi buza otyryp, óz qyzmetin jasyryn jalǵastyryp otyr.

Osyǵan baılanysty mobıldi toptardyń jumysy kúsheıtilip, qazirgi ýaqytta qala aýmaǵynda sanıtarlyq-epıdemıologııalyq talaptardyń saqtalýyna monıtorıng júrgizetin 40 mobıldi top jumys atqarýda.

Karantın rejımin buzý jaıttaryn anyqtaý maqsatynda Shymkent qalasy polıtsııa departamenti aýdandyq polıtsııa basqarmalarynyń qyzmetkerlerimen jáne arnaıy qurylǵan mobıldi toppen birge jyl basynan beri QR ÁQBtK 425-baby boıynsha 2 076 zańbuzýshylyqty anyqtap, is-qujattary sanıtarlyq-epıdemıologııalyq departamentine joldanǵan.

Onyń ishinde toı nemese basqa da jıyn ótkizgen 287 jaıt anyqtaldy.

Reıd barysynda birneshe ret karantın talaptaryn buzǵan 19 nysan (toıhana, meıramhana, kafeler) anyqtalyp, sot arqyly QR Ákimshilik quqyq buzýshylyq týraly kodeksiniń 462-babynyń 3-bóligine sáıkes aıyppul salynyp, qyzmeti bir aı merzimge toqtatylǵan.