Shymkentte tótenshe jaǵdaılar boıynsha ótken keshendi oqý- jattyǵý óz máresine jetti
ShYMKENT. QazAqparat - Shymkentte tótenshe jaǵdaılar boıynsha keshendi oqý-jattyǵýlary aıaqtaldy. Úsh kúnge sozylǵan shara barysynda azamattyq qorǵanys salasy qyzmetkerleri tótenshe jaǵdaı kezindegi turǵyndardy qaýipsiz jerlerge kóshirip, sýdan qutqarý jumystaryn pysyqtady, dep habarlaıdy QazAqparat HAA tilshisi.
Oqý-jattyǵý barysynda Shymkent qalasynda jalpy qalalyq seısmo jattyǵý sharasy ótkizildi. Onda 7 baldyq kúshi bar jer silkinisi oryn alǵan jaǵdaıda zardap shekken jáne baspanasyz qalǵan halyqty qabyldaýǵa arnalǵan shatyrly qalashyq qurylyp, tótenshe jaǵdaıǵa daıyndyq barysy praktıka júzinde pysyqtaldy. Onda 128 adam jáne 35 tehnıka jumyldyryldy. 100 myńnan astam adamdy ýaqytsha ornalastyrýǵa bolatyn qalashyqtyń qurylymyna qala ákimshiligi, qabyldaý pýnkti, tirkeý orny, aqparat pen baılanys pýnkti jáne poshta-telegraf kirdi. Bul jerde turǵyndar sýyq mezgilde jatyn orynmen, taǵammen, sýmen, jyly kıimmen, sonymen qosa, medıtsınalyq, qoǵamdyq tártipti qorǵaý, órtke qarsy kólik quraldarymen qamtamasyz etildi. Qutqarýshylar qala jurtshylyǵyna jer silkinisi kezindegi daǵdylardy úıretip, azamattyq qorǵanys sharalaryn elekten ótkizdi. Seısmıkalyq belsendilikten Turan móltekaýdanynda ornalasqan №5 toǵyz qabatty turǵyn-úıde gaz qubyr jelisiniń buzylýy oryn alyp, úıdiń kireberisinde gaz qospasynyń jınalýyna alyp keldi, jetinshi qabattaǵy páterde janýǵa ulasqan gazdyń jarylýy oryn aldy. Úıdiń turǵyndarynan «101» pýltine órt týraly qońyraýlar túse bastady. Oqıǵa ornyna №2 joǵary shaqyrylym boıynsha Órt sóndirý jáne avarııalyq-qutqarý qyzmetiniń kúshteri men quraldary jiberildi. Barlyǵy jeke quramynda 76 adam, órtke qarsy qyzmettiń 11 tehnıkasy, jedel-qutqarý jasaǵynyń, apattar medıtsınalyq ortalyǵynyń qyzmetkerleri, №6506 áskerı bóliminiń áskerı qyzmetshilerinen barlyǵy 30 adam jumyldyryldy. Jospar boıynsha jumyldyrylǵan energııa jelisi, gazben jabdyqtaý, sý kanaly qyzmetteri energııa qýatyn sóndirý, gaz taldaýyshpen gazdyń shyǵýyn izdestirý jáne órtti sóndirý úshin sý tartqysh jelide sýdyń qysymyn kóterý boıynsha jumystar júrgizdi. 
Bul praktıkalyq is-sharalar azamattyq qorǵanys qyzmetiniń bolýy múmkin tótenshe jaǵdaılardyń saldaryn joıýǵa daıyndyq deńgeıin kóterýge múmkindik berdi. Ekinshi kúni sý aıdynynda ótken jattyǵý kezinde de qaýipsizdik jaǵdaılary jan-jaqty pysyqtaldy. Sebebi, bıylǵy jyly oblysta 30-dan asa adamnyń sýǵa batý jaǵdaılary oryn alǵan. Onyń teń jartysynda balalar zardap shekken.
TJD qyzmetkerleri oqý jattyǵý sharalaryn uıymdastyrý úshin qala syrtyndaǵy «Jaılaýkól» sý aıdynyna bardy. Stsenarıı boıynsha qaýipsiz sharalaryn saqtamaǵan qaıyqtaǵy ekeýge qutqarýshylar dereý kómekke keldi. Sýǵa batyp bara jatqan zardap shegýshilerdi qutqarýshylar shuǵyl jaǵaǵa shyǵaryp, olarǵa alǵashqy kómek kórsetti. Al, búgin tańsáriden bir mezette dabyl qaǵylyp, shuǵyl túrde habarlandyrý júıeleri iske qosyldy. Dabyl daýsynan syrtqa shyqqan turǵyndar jer silkinisi kezindegi daǵdylaryn pysyqtady.
Jalpy, arnaıy stsenarııge qurylǵan mundaı oqý-jattyǵý sharalary shahar aýmaǵynda qatarynan 3 kún boıyna júrgizildi. Mundaı shtattyq mashyqtaný jumystary eki jylda bir ret ótkiziledi.
