Shymkentte tótenshe jaǵdaıdyń saldary retke keltirilýde
Qalada soqqan qatty jeldiń saldarynan birneshe shaǵyn aýdandarda jaryq sónip qalǵan bolatyn. Atap aıtqanda, Pahtakor, Samal-3, Qyzylsaı, Kaıtpas-2, Jańa-talap, Shańyraq, 4 –shi, 18-shi shaǵyn aýdandary men Akjar, Qaınar – bulaq saıajaıy, Otkormsovhoz eldi mekeniniń turǵyndary jaryqsyz qalyp, Baıtursynov kóshesindegi «Front ofıs» ǵımaratynyń 150 sharshy metr shatyry ushqan edi. Sondaı-aq, Soltústik móltek aýdanyndaǵy kópqabatty eki turǵyn úıdiń shatyry men Nursát shaǵyn aýdanyndaǵy 9 qabatty úıdiń qasbeti zaqymdanǵan.
«Osynaý avarııalyq jaǵdaı oryn alýyna baılanysty qala aýmaǵynda ornalasqan 8 jylý qazandyqtary, 8 sorǵy stansalary 20 jeltoqsan keshki saǵat 21:30 - dan 21 kúni tańǵy saǵat 8:35-ke deıin ýaqytsha óshirildi. Oryn alǵan jaǵdaıdy qalpyna keltirý maqsatynda Shymkent qalalyq ákimdigi jáne tótenshe jaǵdaılar departamenti qyzmetkerleri birlesip shuǵyl jumystar atqarýda. Qazirgi tańda jylý nysandary qalypty jaǵdaıda temperatýralyq kestege saı jumys jasaýda. Elektr jelisinde anyqtalǵan aqaýlar tolyǵymen joıylyp, turǵyn úıler elektr qýatyna qosylyp jatyr. Arnaıy jasaqtalǵan brıgadalar jumys júrgizip, jalpy qaladaǵy sóngen elektr jaryǵyn 1-2 saǵat kóleminde tolyq qosý josparlanýda»,- delingen qalalyq ákimdiktiń habarlamasynda.
Qalalyq ákimdik pen TJD turǵyndarǵa keleńsiz jaǵdaılar oryn alǵan jaǵdaıda 87252-24-72-99 baılanys telefonyna habarlasýlaryn eskertip otyr.
«Qurmetti turǵyndar apat aıtyp kelmeıdi. Keleńsiz jaǵdaılar oryn alǵan jaǵdaıǵa sabyrlylyqpen qaraýǵa shaqyramyz. Qala turǵyndarynyń árbir aryz-shaǵymdary Shymkent qalasy ákimdiginiń qatań baqylaýynda ekendigin nazarlaryńyzǵa jetkizemiz»,- delingen habarlamada.