Shymkentte tótenshe jaǵdaı rejımin buzǵan 13 adam qamaýǵa alyndy
ShYMKENT. QazAqparat – Shymkentte 16-27 naýryz aralyǵynda tótenshe jaǵdaıǵa baılanysty engizilgen shekteýlerdi buzǵan 22 adamnyń isi ákimshilik sotta qaraldy, dep habarlaıdy QazAqparat tilshisi.
Qalalyq sottyń baspasóz qyzmetiniń málimetinshe, 13 adam qamaýǵa alynyp, 3 turǵyndy sotqa kúshtep ákelý týraly uıǵarym shyǵaryldy. Taǵy 5 adamǵa 10 aılyq eseptik kórsetkish mólsherinde aıyppul salynǵan.
«Al, áreketinde ákimshilik quqyq buzýshylyqtyń bolmaýyna baılanysty 1 adam jaýapkershilikten bosatyldy. Aldaǵy ýaqytta osyndaı ákimshilik quqyq buzýshylyqty boldyrmaý maqsatynda, jergilikti turǵyndar men kásipkerlerdi tótenshe jaǵdaı rejımin saqtaý jáne ony oryndaý talap etiledi», - delingen habarlamada.
