Shymkentte topyraq jol bolmaıdy - Nurlan Saýranbaev
ShYMKENT. QazAqparat - Shymkentte 91 kóshege kúrdeli jáne ortasha jóndeý jumystary júrgizilip, 12 kóshege jaıaý júrginshiler joly salynǵan. Búgin jurtshylyq aldynda esep bergen qala basshysy aldaǵy ýaqytta Shymkentte topyraq jabyndyly jol bolmaıtynyn atap ótti, dep habarlaıdy QazAqparat tilshisi.
Ákimniń sózinshe, qazirgi tańda qala aýmaǵynda jalpy uzyndyǵy 1 506 shaqyrym jol asfalttalǵan. Al, 1 080 shaqyrym jolǵa qıyrshyq tas tóselse, 296 shaqyrym topyraq jol bar. 2018 jyly bıýdjetten uzyndyǵy 15 shaqyrym bolatyn magıstraldy 8 kósheniń qurylysyna 5,3 mlrd teńge bólinedi dep josparlanǵan.
«136 shaqyrym ishki oram joldaryn jóndeledi. Bıyl Bekjan bazary aýmaǵyndaǵy jol ótkeliniń qurylysyn aıaqtaý jáne Badam ózeni ústinen ótetin avtojol kópirin qaıta qurý josparlanǵan. Uzyndyǵy 119 shaqyrym joldyń qurylysy jáne 27 kóshege jaıaý júrginshiler jolyn salýǵa jobalyq-smetalyq qujattar daıyn. 128 ishki oram kóshesin jóndeý josparda bar»,-dedi Nurlan Saýranbaev.
Jıyn barysynda halyqty sapaly aýyz sýmen qamtamasyz etý máselesi de sóz boldy. Máselen, ótken jyly qaladaǵy bes shaǵynaýdanda aýyz sý tartý jumystary bastalyp, olardyń úsheýiniń jumysy aıaqtalǵan. Nátıjesinde 3300 tutynýshy sapaly aýyzsýǵa qol jetkizgen.
«Aǵymdaǵy jyly Altyntóbe, Saıram eldimekenderindegi ishki sý júıeleriniń jáne Dostyq shaǵynaýdanynan Temirlan tas jolyna deıingi magıstraldy aýyz sý qubyrynyń qurylysy júrgiziledi. Osy jumystardyń nátıjesinde sapaly aýyz sýǵa qol jetkizý kórsetkishin 96 paıyzǵa jetkizý josparlanýda. Qazirgi tańda, qala turǵyndarynyń 93 paıyzy ortalyqtandyrylǵan aýyz sýmen qamtylǵan», - dedi Nurlan Saýranbaev.
