Shymkentte Tóle bı týraly 10 serııaly fılm túsiriledi
ASTANA. QazAqparat - Shymkentte oblys ákiminiń bastamasymen ultymyzdyń ataqty bıi Tóle babanyń tolyq ómirbaıanyna negizdelgen 10 serııaly «Tóle bı» kıno jobasy jáne úsh júzdiń basyn qosqan kıeli mekenge arnalǵan «Ordabasy - birliktiń týy» atty anımatsııalyq fılmi daıyndalady. Bul týraly Ońtústik Qazaqstan oblysy ákimdiginiń baspasóz qyzmeti habarlady.
Baspasóz málimetterine qaraǵanda, Memleket basshysy N.Nazarbaev «Bolashaqqa baǵdar: rýhanı jańǵyrý» baǵdarlamalyq maqalasynda «Mádenı ónimderimiz tek kitap túrinde emes, ártúrli mýltımedıalyq tásildermen de shyqqany abzal» dep atap ótken. Osyǵan oraı Ońtústik Qazaqstan oblysynda óńir basshysy Janseıit Túımebaevtyń qoldaýymen ótken jyly balalarǵa arnalǵan tarıhı-tanymdyq 3 anımatsııalyq fılm men oblystyń kıeli jerlerin nasıhattaıtyn kóp serııaly telehıkaıa túsirildi.
Atap aıtqanda, «Kúsh atasy - Qajymuqan», «Kıeli Qazyǵurt», «Otyrardy qorǵaý» syndy mýltfılmderi men 10 serııaly «Kóne Jetigenniń syry» atty fılmi túsirildi. Atalǵan týyndylardy «Ońtústikfılm» men «SAQ» kınostýdııasy daıyndady.
Qazirgi tańda sheteldik telearnalar qyzyǵýshylyq tanytyp otyrǵan tyń dúnıelerdiń aldaǵy ýaqytta Astana, Almaty qalalary men elimizdiń barlyq oblystarynda tanystyrylymy ótip, kórermenge jol tartatyn bolady. 16 naýryz ben 20 mamyr aralyǵynda respýblıkanyń barlyq oblys ortalyqtaryndaǵy mádenıet úıleri men kınoteatrlarynda «Otyrardy qorǵaý», «Kúsh atasy - Qajymuqan», «Kıeli Qazyǵurt», anımatsııalyq fılmderi, «Kóne jetigenniń syry» teleserıaly kórsetiledi.
«Munyń ózi óskeleń urpaqtyń boıyna otanshyldyq, týǵan jerge degen adaldyq syndy qasıetterdi darytyp, tól tarıhty boılaryna sińdirýge sep bolmaq»,-delingen habarlamada.
Sonymen qatar, bul joba aǵymdaǵy jyly da jalǵasyn taýyp otyr. Oblys basshysynyń bastamasymen ataqty Tóle babanyń tolyq ómirbaıanyna negizdelgen 10 serııaly «Tóle bı» kıno jobasy jáne úsh júzdiń basyn qosqan kıeli mekenge arnalǵan «Ordabasy - birliktiń týy» atty anımatsııalyq fılmi daıyndalady.
Sondaı-aq qazaq handyǵynyń ordasy bolǵan, halqymyzdyń uly tulǵalary máńgilik meken tapqan kıeli jerdi jas balǵyndarǵa tanystyrýǵa arnalǵan «Túrkistan» jáne Uly Jibek joly boıyndaǵy tarıhı qalalardyń biri, álemdegi ekinshi Ustaz atanǵan Ál Farabıdiń týǵan jeri Oqsyz qalasynyń tarıhy men uly ǵalym jaıly «Oqsyz oqıǵasy» anımatsııalyq fılmderi qalyń kópshilik nazaryna usynylatyn bolady.
