Shymkentte Tóle bı aýdanynyń kúnderi ótýde
Memleket basshysynyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasyn júzege asyrý men Ońtústik Qazaqstan oblysynyń 85 jyldyǵyna oraı uıymdastyrylǵan festıvalǵa 600-ge jýyq tólebılik ónerpaz qatysatyn onǵa jýyq is-shara uıymdastyrylady.
Shymkent qalasyndaǵy Ákimshilik iskerlik ortalyǵynda aýyl sharýashylyǵy eńbekkerleriniń dástúrli «Altyn kúz - 2017» jármeńkesinen bastaý alǵan sharaǵa Ońtústik Qazaqstan oblysynyń ákimi Janseıit Túımebaev qatysty.
Onda ákim, gobelen óneriniń qas sheberi Q.Tynybekovtyń 70 jyldyǵyna arnalǵan qylqalam, qolóner sheberleriniń kórmesin, aýyl sharýashylyq ónimderiniń jármeńkesin jáne «Tóle bı barysy» oblystyq ashyq týrnırin tamashalady.
Birneshe aıǵa sozylǵan «Týǵan jer - altyn besigim» atty oblystyq óner festıvali Shymkentti dýmanǵa bólep jatqanyn aıtqan ákim, festıvaldi joǵary deńgeıde uıymdastyrýǵa atsalysqan barsha azamattarǵa alǵysyn jetkizdi.
«Bul aýqymdy shara aýdan-qalalardyń mádenıeti men rýhanııatynyń kórinisinen bólek, áleýmettik-ekonomıkalyq órkendeýin de aıǵaqtap otyr. Bul oblystyq is-sharamyz Elbasymyz Nursultan Ábishuly Nazarbaevtyń «Bolashaqqa baǵdar» rýhanı jańǵyrý» baǵdarlamalyq maqalasyndaǵy «Týǵan jer» baǵytymen tikeleı úndesip jatyr. «Kóktemniń bir kúni jylǵa azyq» degendi óz basynan ótkergen sharýanyń erte kóktemnen tynym tappaı atqarǵan eńbeginiń rahatyn kóretin kezi - osy qońyr kúz. Tólebıdiń aýylsharýashylyq salasynyń qyzmetkerleri jyldy jaqsy qorytyndylady. Buǵan dálel - búgingi jármeńkedegi sanyna sapasy saı azyq túliktiń barlyq túrin, oǵan degen halyqtyń qyzyǵýshylyǵy men jaqsy suranysyn kórip otyrmyz. Sondyqtan agrarlyq sektordaǵy jetistikterimizdi barsha oblys eńbekkerleriniń ortaq jeńisi dep baǵalaımyz», - dedi ákim.
Budan bólek, tólebılikter kelýshilerge dámi til úıirer Dıhankól qymyzyn tegin taratyp, «Sirge móldireter» dástúri men «Marqa kóterý» balýandar jáne mergender saıysyn usyndy. Іs-shara barysynda ulttyq-mádenı ortalyqtarynyń as mázirinen kórme, «Altybaqan» oıyn-saýyq otaýy aıasynda «Saqına salý» oıyndaryn uıymdastyrdy.
Dál osy kúni J.Shanın atyndaǵy oblystyq akademııalyq qazaq drama teatrynda «Jebe» halyqtyq drama ujymynyń Ádilbek Bekbosynulynyń «Tóle bıdiń tóreligi» atty arnaıy qoıylymy qoıyldy. Týyndyda 1725 jylǵy oqıǵa kórinis taýyp, sıpattaldy.
Sondaı-aq «Otyrar» oblystyq ǵylymı-ámbebap kitaphanasynda aqyn, jýrnalıst, ǵalym, baspager, Qazaqstan Jazýshylar odaǵynyń múshesi, fılologııa ǵylymdarynyń kandıdaty Temirǵalı Kópbaev pen aýdandyq «Tóle bı týy» qoǵamdyq-saıası gazeti redaktorynyń orynbasary, Orynbasar Súttibaevtyń oqyrmandarmen kezdesý keshi ótti. Shara sońy aýdandyq kórkem ónerpazdardyń Gala-kontsertine ulasatyn bolady.
