Shymkentte Toqtar Tóleshovke qatysty sot úkimi shyqty
ShYMKENT. QazAqparat - Shymkentte Toqtar Tóleshovke qatysty sot úkimi shyqty. Eńbekshi aýdandyq sotynyń sýdıasy Myrzaly Jorabaev burynǵy «syra korolin» Qylmystyq kodekstiń úsh baby boıynsha kináli dep taýyp, 21 jylǵa bas bostandyǵynan aıyrý jazasyna kesti, dep habarlaıdy QazAqparat tilshisi.
Tóleshov Qylmystyq kodekstiń 245 baby, 3 bóligi «Uıymdarǵa salynatyn salyqty jáne (nemese) bıýdjetke tólenetin basqa da mindetti tólemderdi tóleýden jaltarý», 251-baby «Jekeshe notarıýstardyń, baǵalaýshylardyń, jeke sot oryndaýshylarynyń, medıatorlardyń jáne aýdıtorlyq uıym quramynda jumys isteıtin aýdıtorlardyń ókilettikterdi teris paıdalanýy» boıynsha, 28-baby «Qylmystyq quqyq buzýshylyqqa sybaılas qatysýshylardyń túrleri» boıynsha aıypty dep tanyldy.
Qalǵan baptar boıynsha taǵylǵan aıyptar merziminiń ótýine baılanysty qysqaryp ketti. Sýdıa atalǵan Qylmystyq kodekstiń 58-babynyń 3-bóligine súıene otyryp jazany alǵashqy Astana qalalyq áskerı mamandandyrylǵan sotynyń úkimine sáıkestendirilgenin aıtty. Sonymen, Tóleshovke 21 jyl bas bostandyǵynan aıyrý jazasy qaldyryldy.
Jaza barynsha qatań túrde óteletin boldy. Memleket paıdasyna aıyptalýshy Tóleshovten oblystyq prokýratýranyń talap etken 1 mlrd 352 mln teńgesin jáne BAJ salyǵy retinde 41 mln 057 myń teńgeni, sondaı-aq saraptamalarǵa jumsalǵan 3 mln 010 myń teńge óndiriletin boldy. Al, Memlekettik kirister departamenti talap etken 1 mlrd 452 mln 653 myń teńge azamattyq tártippen qaıta qaralady.
Alaıda Toqtar Tóleshov sýdıanyń úkimimen kelispeıtinin aıtty.
«Men búgingi úkimmen kelispeımin. Buniń bári bireýge qajet bolǵan teatr. Shaǵym keltiremiz. Odan birdeńe ózgere qoımaıtynyna kózim jetip tur»,- dedi Toqtar Tóleshov.
