Shymkentte toqtap qalǵan toqyma fabrıkasy jumysyn qaıta bastady
ShYMKENT. QazAqparat - Shymkentte toqtap qalǵan «OxyTextile» JShS-i toqyma fabrıkasy jumysyn qaıta bastady. Seriktestik «Azala Cotton-men» múliktik keshenin biriktirip, «Azala Cotton» JShS bolyp qaıta quryldy, dep habarlaıdy QazAqparat HAA tilshisi.
«Azala Cotton» fabrıkasyn ashý úshin osy jyldyń naýryz aıynda ınfraqurylym júrgizý, qural jabdyqtar men óndiristik tsıkldi qalpyna keltirý sharalary qolǵa alyndy. Qazirgi tańda qondyrǵylardy iske qosý jumystary aıaqtaldy.
Búginde atalǵan kásiporynda 300-ge jýyq adam jumys isteıdi. Kásiporyn jylyna 6 myń tonna kardalyq jáne taralǵan maqta ıirim jipterin óndirýge qaýqarly. Zaýyt ónimderi TMD men alys-jaqyn shetelderge eksporttalady dep josparlanýda.
Jalpy, jobaǵa tartylǵan ınvestıtsııanyń kólemi - 5,4 mlrd.teńgeni quraıdy.
