Shymkentte tok soqqan balanyń jaǵdaıyn dárigerler óte aýyr dep baǵalaýda
ShYMKENT. QazAqparat - Shymkentte joǵary kerneýli tok soqqan balanyń jaǵdaıyn dárigerler óte aýyr dep baǵalaýda. Denesiniń 60 paıyzyn kúıik shalǵan jetkinshek es-tússiz jatyr, dep habarlaıdy QazAqparat tilshisi.
Keshe vagonǵa shyǵamyn dep tokqa túsip qalǵan bala qazir oblystyq balalar aýrýhanaǵa jatqyzylǵan. Dárigerlerdiń aıtýynsha, 11 jasar jetkinshektiń qoly men aıaǵy, arqa tusy qatty kúıip qalǵan. Sondaı-aq qatty soqqydan jambasy synyp ketipti.
«Keshe bala aýrýhanaǵa 11.30-dar shamasynda tústi. Túsken kezdegi jaǵdaıy óte aýyr boldy. Aýyrlyǵy alǵan polıjaraqatyna, elektrjaraqatqa, elektro kúıik 2,3-shi dárejeli deneniń 60 paıyzy jáne oń jaq sanynyń synýy, jaraqat shogynyń óte aýyr dárejesine baılanysty jaǵdaıy qazir óte aýyr. Qazirgi kezde ol jasandy tynys alý apparatyna qosylǵan. Biz onyń kúıik shalǵan jerleri men synǵan súıegin tańyp qoıdyq. Qoldan kelgen emdik sharalardy jasap jatyrmyz», - deıdi Oblystyq balalar aýrýhanasynyń dárigeri Nurpeıis Shyrynbek.
Qazirgi ýaqytta qaıǵyly oqıǵa boıynsha Shymkent jelilik ishki ister bólimi tergeý-tekserý sharalaryn júrgizýde.
«Tergeý amaldary júrgizilip jatyr. Qazirgi tańda, QR Qylmystyq kodeksiniń 344-baby 1-bóligimen is qozǵalyp, sotqa deıingi tergep tekserý amaldary bastaldy. Endi ol tergeý barysynda kórsetiledi», - deıdi Shymkent jelilik ishki ister bóliminiń ınspektory Aıda Maqasheva.
Eske sala keteıik, oqys jaǵdaı keshe Shymkenttiń irgesindegi Kóksaı-1 eldimekeniniń mańynda bolǵan edi. Mektepten qaıtyp kele jatqan bala temir joldaǵy júk vogonyna shyǵyp, joǵarǵy kerneýli tok soqqan. Jetkinshektiń denesin kúıik shalyp, ol oblystyq balalar aýrýhanasyna jetkizilgen bolatyn.
