Shymkentte toǵyz qabatty úıden órt shyǵyp, 130 adam dalada qalǵan
ShYMKENT. QazAqparat - Shymkentte toǵyz qabatty úıden tún ishinde órt shyǵyp, 130 adam dalada júrýge májbúr bolǵan, dep habarlaıdy QazAqparat tilshisi.
Oblystyq TJD baspasóz qyzmetiniń málimetinshe, órt túngi saǵat 23.01-ler shamasynda Jeltoqsan kóshesindegi kópqabatty úıdiń birinshi qabatynan shyqqan. Elektr symdary turǵan jer otqa oranyp, toǵyz qabatty úıdiń barlyq turǵyndary syrtqa shyǵaryldy. Oqıǵa ornyna 25 órt sóndirýshi men 4 tehnıka jumyldyrylyp, jalyn tolyǵymen aýyzdyqtalǵan. Sonyń saldarynan jaryq sónip, turǵyndar birneshe saǵat boıy dalada júrýge májbúr bolǵan.
Turǵyndardyń sózinshe, kók týtinnen adamdar úılerine kire almaı, syrtta júrgen. Bazbireýler týystaryn jaǵalap ketse, endi biri bala-shaǵasymen tútinniń basylýyn dalada kútipti. Tútinge tunshyqqandar úshin jedel járdem qyzmeti de shaqyrtylǵan. Jaryqqa jaýapty sala qyzmetkerleri týnimen transformator aýystyryp, ábigerge túsipti. Al, turǵyndardyń janyp ketken eseptegish quraldaryn kim aýystyratyny ázirge belgisiz. Jóndeý jumystary áli jalǵasyp jatqandyqtan jaryq áli berilmeı otyr,- deıdi páter ıeleri.
