Shymkentte tirkemesine jumysshylar mingen traktordy júk kóligi soǵyp ketti
Jol kólik oqıǵasy búgin tańerteńgi 9-dar shamasynda oryn alǵan. Qala shetindegi óndiristik aımaqqa baratyn jolda «Howo» júk kóligi traktormen soqtyǵysyp, keıingisiniń tirkemesi ajyrap ketken. Kýágerlerdiń sózinshe, tirkemede bolǵan jumysshylar osy kezde aýdarylǵan. Abyroı bolǵanda olar jol jıegindegi kók shóptiń ústine qulapty. Sonyń ózinde bes adam zardap shegip, olardy jedel-járdem kóligi alyp ketken. Dárigerler jumysshylardyń bireýin ǵana aýrýhanaǵa jatqyzdyq dep otyr.
«Aýrýhanaǵa túrli dene jaraqattarymen 3 er adam jáne 2 áıel tústi. Olardyń bireýi bas mı jaraqatyn alǵandyqtan aýrýhanaǵa jatqyzyldy. Taǵy biriniń jaraqaty betinen bolǵandyqtan tıisti medıtsınalyq tekserýden ótkizip jatyrmyz. Sodan keıin qalatyn qalmaıtyny belgili bolady. Ózgelerine alǵashqy medıtsınalyq járdem kórsetilgen soń úılerine qaıtaryldy», - deıdi Shymkent qalalyq jedel-járdem aýrýhanasy qabyldaý bóliminiń meńgerýshisi Sábıt Baıbosynov.
Qazir jol apatynyń sebep saldaryn Shymkent qalalyq ІІD anyqtaýshylary tekserip jatyr.
