Shymkentte terrorıstik top múshesi 7 jylǵa sottaldy

ShYMKENT. QazAqparat - Shymkentte terrorıstik toptyń qyzmetine qatysqan turǵynǵa qatysty sot otyrysy aıaqtaldy. Ál-Farabı aýdandyq soty jat aǵymnyń jeteginde ketken Erbolat Aıtahýnovty kináli dep taýyp, 7 jylǵa bas bostandyǵynan aıyrdy, dep habarlaıdy QazAqparat tilshisi.

Oblystyq sottyń málimetinshe, 46 jastaǵy turǵynǵa Qylmystyq kodekstiń 257-baby «Terrorıstik top qurý, oǵan basshylyq etý jáne onyń áreketine qatysý» boıynsha aıyp taǵyldy.

«Onyń qylmysy tákfirlik teris kózqarasta bolǵan. Ol Kavkazǵa, Ázerbaıjanǵa barǵan. Sodan ary ótip, Iran arqyly Sırııaǵa barǵan. Aýǵanstanda bolǵan. Ondaǵy maqsatyn kápirlerge qarsy kúres deıdi. Terrorıstik aktiler jasaý, degenmen ózderi de maqsattaryn tolyq bilmeıdi. Tek teris kózqarastaǵy adamdardyń jetegimen, solardyń aıtýymen júrgen», - dedi oblystyq sottyń Qylmystyq ister jónindegi alqa tóraǵasy Zııaddın Pirnııaz.

Sondaı-aq, Qylmystyq alqanyń tóraǵasy sot úkimi kúshine enbegenin atap ótti.

Osyny eskergen aıyptalýshy sot úkimimen kelispeıtinin bildirip, ony oblystyq sottyń appelıatsııalyq alqasyna qaraýǵa ótkizgenin aıtty.