Shymkentte tennısten jasóspirimder arasyndaǵy halyqaralyq týrnır ótýde
ShYMKENT. QazAqparat - Shymkenttegi ulttyq tennıs ortalyǵynda sporttyń osy túrinen jasóspirimder arasyndaǵy ITF- JUNIORS G3 týrnıri ótýde. Halyqaralyq deńgeıde uıymdastyrylǵan saıysqa 15 memleketten 130-dan asa sportshy qatysyp otyr, dep habarlaıdy QazAqparat tilshisi.
Elimizdiń tenıs federatsııasynyń vıtse- prezıdenti Dıas Dosqaraevtyń sózinshe, 18-23 maýsym aralyǵynda ótetin jarysqa qatysý arqyly qurama komandalardyń oıynshylary tájirıbe jınaqtap, úlken daıyndyqtan ótedi.
«Bul saıysqa elimizdiń eń myqty oıynshylary qatysyp otyr. Solardyń biri Dostanbek Tashbýlatov ótken jyly AQSh-ta ótken Orange Bowl jarysynda kúmis medal jeńip alyp, jasóspirimder arasynda úzdik sportshy sanalyp otyr. Dostanbekke bul oıyn óte mańyzdy, sebebi upaı jınaý kerek. Odan basqa da oıynshylarymyz Málik Omarhanov, Erasyl Murat, Ekaterına Dmıtrıchenko, Darıa Detkovskaıa, Anastasııa Astahova, Elızaveta Karlova men Marııa Sınıtsynalar qatysyp otyr. Bapkerlerimiz de oıyndy kórip otyryp, qaı jaǵynan jumys isteýimiz kerek dep, basqa elden kelgen oıynshylardyń tájirıbesin qaraýda. Shymkentten ashylǵan ulttyq tennıs ortalyǵy halyqaralyq deńgeıdegi ATP Chellendjer sııaqty jarystardy ótkizýge múmkindik berip otyr. Bul jerde 18 kort, qonaqúı sııaqty barlyq múmkindik jasalǵan. Qazirgi tańda elimizde uıymdastyrylyp jatqan halyqaralyq jarystardyń 60 paıyzy osy Shymkentte ótedi», - deıdi Dıas Dosqaraev.
Jarys barysynda arnaıy baspasóz máslıhaty uıymdastyrylyp, onda QR tennıs federatsııasy Ońtústik Qazaqstan oblysyndaǵy fılıalynyń jańa dırektory tanystyryldy. Bul qyzmetke oblystyq máslıhattyń hatshysy, kásipker Qaırat Balabıev laıyq dep tanyldy. Jańa basshysy sporttyń osy túrimen etene tanys ekenin ári ony óńirde damytýǵa zor úlesin qosatynyn jetkizdi.
«Meniń osy qyzmetke taǵaıyndalýym maǵan úlken jaýapkershilik júkteıdi. Bul rette maǵan senim artyp otyrǵan federatsııanyń basshylyǵyna alǵysymdy aıtamyn. Bizdegi ulttyq tennıs ortalyǵynda myqty mamandar kóp. Biz aldaǵy ýaqytta aýyldyq jerlerde turatyn balalardy osynda tasymaldap, jattyǵýyna jaǵdaı jasaıtyn bolamyz. Keleshekte jetim balalardyń da shuǵyldanýyna múmkindik beremiz. Óıtkeni bul sport túri barlyq balaǵa qoljetimdi bolýy kerek», - dedi Qaırat Balabıev.
Brıfıngte sondaı-aq sporttyń osy túrin ońtústik óńirinde damytý jaıy sóz boldy. Ol úshin oblys aýmaǵynda qyrýar qarajat bólinip, balalardy tennıske tartý úshin barlyq jaǵdaılar jasalyp jatqany aıtyldy. Onyń ishinde Ulttyq tennıs ortalyǵynyń orny erekshe ekeni atap ótildi.
Aıta keteıik, ulttyq tennıs ortalyǵy Abaı saıabaǵynyń 3,47 gektar jerin alyp jatyr. Nysandy salýǵa 1,51 mlrd teńge jumsaldy. Ǵımarattyń qurylysy 2016 jyly bastalyp, bıyl jyldyń aqpan aıynda aıaqtalǵan. Sporttyq nysanda 100 oryndyq minbe, 20 adamǵa shaqtalǵan ınternaty jáne 48 oryndyq ashanasy bar.
