Shymkentte táýlik boıy 15 statsıonarlyq polıtsııa beketi jumys isteıdi

NUR-SULTAN. QazAqparat - Shymkent qalasynyń aýmaǵynda azamattardyń qaýipsizdigin qamtamasyz etý jáne qoǵamdyq tártipti saqtaý maqsatynda adamdar 15 statsıonarlyq bekette táýlik boıy jumys istep tur, dep habarlaıdy QazAqparat qalalyq Polıtsııa departamentiniń baspasóz qyzmetine silteme jasap.

Árbir statsıonarlyq beketke 3 aýysymmen 2 qyzmetkerden kezekshilikke túsip, tártipti qadaǵalaıdy. Statsıonarlyq beketterdiń barlyǵy zamanaýı tehnıkamen: portatıvti beınetirkeýishtermen, radıostantsııalarmen jáne planshettermen jabdyqtalǵan.

«Statsıonarlyq beketter 181 syrtqy beınebaqylaý júıesimen jabdyqtalyp, Polıtsııa departamentiniń Jedel basqarý ortalyǵyna qosylǵan. Jol qaýipsizdigin, qoǵamdyq oryndarda, kóshelerde qylmystyń aldyn alý boıynsha qyzmet atqarady. Kameralar arqyly 25 qylmys ashylyp, 47 602 ákimshilik hattama toltyryldy», - dedi Shymkent qalasy Polıtsııa departamenti Jergilikti polıtsııa qyzmeti basqarmasynyń bastyǵy, polıtsııa podpolkovnıgi Mýhtar Býharbaev.
Іs júzinde statsıonarlyq beketter óz tıimdiligin kórsetip jatyr. Mysaly qoǵamdyq oryndarda jasalǵan qylmystyń sany ótken jylmen salystyrǵanda 26,6%, al kóshelerde 21,5% tómendegen.
Azamattar ótinish, aryz nemese jeke máselesimen kez kelgen ýaqytta osy beketterde qyzmet etetin qyzmetkerlerge júginip, tıisti kómegin ala alady.