Shymkentte táýligine 20 myń jolaýshy ótkizetin jańa temirjol vokzaly salynady
Joba tujyrymdamasy halyqaralyq bastamashyl toppen, joba jetekshisi, ekonomıka ǵylymdarynyń doktory, professor Alıhan Bıjanov pen tehnıka ǵylymdarynyń doktory, professor, «Baılanys joldaryn damytý ǵylymı-zertteý ınstıtýty» JShS-niń dırektory Altaıbek Orazbekov, QR Sáýletshiler odaǵynyń OQO fılıalynyń tóraǵasy Asqar Mamyrbaev jáne «Qazaqstan temir joly» Ulttyq kompanııasy» AQ ókilderimen birlese ázirlendi. Atalǵan top ókilderiniń sózinshe, bul joba zertteý qorytyndysy boıynsha Prezıdenttiń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýyna sáıkes keledi. Óıtkeni temir jol jelisin salý kezinde kólik salýdyń jáne paıdalanýdyń ozyq «tsıfrlyq» tehnologııalary engizilse, kólik protsesinde ınnovatsııalyq tehnologııalar júzege asyrylatyn bolady. Shym shahardyń bas josparyna saı «Batys Eýropa -Batys Qytaı» halyqaralyq kólik dáliziniń boıynda salynýy tıis vokzaldyń jobasy aıasynda «Shymkent-2» jańa temirjol vokzaly men júkti suryptaý stantsııasy jáne úlken avtovokzal salynady dep josparlanýda. Sonymen birge jalpy alańy 16 gektardy quraıtyn jobada qonaq úı men ákimshilik ǵımarat, 1000 avtokólikke arnalǵan turaq qarastyrylǵan.
Joba jetekshisi Shymkent qalasynyń 2020 jyly bolatyn TMD elderiniń mádenı astanasy jylyna oraı, jobany iske asyryp, paıdalanýǵa berý múmkindigin aıtty. Óz kezinde oblys ákimi bul jobanyń áleýmettik mańyzy bar ekenin jáne jolaýshylarǵa qyzmet kórsetýdi jaqsartýǵa jáne týrısterdi aımaqqa tartýǵa múmkindik beretinin atap ótti. Osyǵan baılanysty ol tıisti vedomstvo basshylaryna jobany júzege asyrý úshin jumys tobyn qurýdy tapsyrdy.
Qazirgi tańda joba respýblıkalyq memlekettik-jekeshelik áriptestik jobalaryn josparlaý algorıtmine sáıkes Qazaqstan Respýblıkasynyń ýákiletti memlekettik organdarymen jumys úılestirý satysynda tur.
