Shymkentte tastandy shaqalaqtyń anasy tabyldy, polıtsııa is qozǵady
10 naýryz kúni T.Rysqulov kóshesinde ornalasqan kópqabatty úılerdiń biriniń aýlasynda jańa týǵan náreste tabylǵan bolatyn. Atalǵan jaıt boıynsha ál-Farabı aýdany polıtsııa basqarmasynyń qyzmetkerleri QR Qylmystyq kodeksiniń 119-baby 1-bóligimen (Qaýipti jaǵdaıda qaldyrý) qylmystyq isti tirkedi. Búgin Shymkent qalasy Polıtsııa departamentiniń baspasóz qyzmeti tastandy sábıdiń anasynyń tabylǵandyǵy týraly aqparat taratty.
«Jedel-izdestirý is-sharalarynyń nátıjesinde 1995 jyly týǵan azamatsha anyqtalyp, polıtsııaǵa jetkizildi. Qazirgi tańda tergep-tekserý amaldary jalǵasýda. Ózge aqparat QR QPK-niń 201-babyna sáıkes tergeý múddesine oraı jarııa etýge jatpaıdy», - delingen habarlamada.
Aıta keteıik, Shymkentte óte aýyr jaǵdaıda tabylǵan tastandy nárestege jedel járdem dıspetcherleri alǵashqy medıtsınalyq kómek kórsetip, aman alyp qaldy. Salmaǵy 3 keli shaqalaq qazir aýrýhanada.