Shymkentte tapa-tal túste 2 áıeldiń altyn alqasyn julyp áketken
ShYMKENT. QazAqparat - Shymkentte altyn alqa urlaýdy kásip etken kúdikti ustaldy. Qazirgi tańda polıtsııanyń quryǵyna túsken seziktiniń eki alqa urlyǵyna qatysy bar ekendigi anyqtalyp otyr, dep habarlaıdy QazAqparat tilshisi.
Qalalyq PD málimetinshe, kúdikti bir aptada eki ret altyn buıymyn urlaǵan. Ol kúndizgi ýaqytta Qarataý aýdanyndaǵy kóshelerdiń birine shyǵyp, jolda ketip bara jatqan áıelge shabýyl jasaǵan. Moınyndaǵy quny shamamen 100 myń teńge turatyn altyn alqasyn julyp alǵan. Sóıtip oqıǵa ornynan boı tasalaǵan. Arada birneshe kún ótkende ol taǵy urlyqqa shyǵyp, ózge áıeldiń quny shamamen 160 myń teńge turatyn alqasyn alyp ketken.
«Shymkent qalasynyń Qarataý aýdandyq polıtsııa basqarmasynyń qyzmetkerleri jedel-izdestirý is-sharalaryn júrgizý barysynda atalǵan kúdiktini ustady. Atalǵan jaıttar boıynsha Qylmystyq kodekstiń 191 «tonaý» babymen sotqa deıingi tergeý amaldary júrgizilýde», delingen habarlamada.
