Shymkentte tanymal sýretshi Kerimbaı Qystaýbaıdyń kórmesi ótti
ASTANA. QazAqparat - Búgin Shymkentte oblystyq ádet-ǵuryp jáne salt-dástúr ortalyǵynda Qazaqstannyń eńbek sińirgen qaıratkeri, sýretshi Kerimbaı Qystaýbaıdyń «Taýlardyń taǵdyry» atty jeke shyǵarmashylyq kórmesi uıymdastyryldy.
Beıneleý ónerinde ózindik qoltańbasy bar, qylqalam sheberiniń kórmesine oblys ákimi Janseıit Túımebaev arnaıy qatysyp, jınalǵandarǵa rızashylyǵyn bildirdi, dep habarlaıdy OQO ákimdiginiń baspasóz qyzmeti.
«Bul týyndylar erteńimiz úshin umytylmas tarıh. Qylqalammen tarıhymyzdy beınelep, bederleýde Qystaýbaı Kerimbaıdyń ónerine tánti bolmasqa shara joq. Shyǵarmashylyǵyńyzǵa shalqar shabyt tileımin. Bekzat ónerdiń bekzadasyna aınalyńyz»,- dedi oblys basshysy.
Sharanyń maqsaty - jastardyń salt-dástúrimiz ben ádet-ǵurypymyzǵa degen súıispenshiligin artyryp, kórkem shyǵarmalar arqyly estetıkalyq tárbıe berý.
Sýretshi shyǵarmalaryndaǵy syrly boıaýlar óte názik te jumsaq reńkpen úılesimin tapqan. Avtordyń minezine tán jumsaqtyq kartınadaǵy beınelerden de anyq baıqalady. Ásirese, onyń elimizdiń sulý tabıǵattary taqyrybyndaǵy «Han Táńiri», «Alataý asýlary», «Aq qarly Alataý», «Aýylym», «Kúz sonatasy», «Balalyq shaqqa saıahat», «Taý shyńy», «Kempirqosaq», «Ańyzǵa saıahat» syndy týyndylary aıqyndylyǵymen, kompozıtsııalyq oılarynyń tereńdigimen erekshelenedi.
Aıta keteıik, Kerimbaı Ysauly búginde O.Tańsyqbaev atyndaǵy Almaty sándik-qoldanbaly óner kolledjiniń dırektory qyzmetin abyroımen atqaryp keledi. Ol T.Júrgenov atyndaǵy Qazaq Ulttyq óner akademııasynyń professory, Qazaqstan Sýretshiler Odaǵynyń múshesi.
