Shymkentte taksı júrgizýshisin óltirgender 12 jylǵa sottaldy
ShYMKENT. QazAqparat - Shymkentte taksı júrgizýshisin óltirgender 12 jylǵa sottaldy. Ońtústik Qazaqstan oblystyq qylmystyq ister jónindegi mamandandyrylǵan aýdanaralyq soty eki aıyptalýshyny da Qylmystyq kodekstiń eki babymen kináli dep taýyp, uzaq merzimge bas bostandyqtarynan aıyrdy, dep habarlaıdy QazAqparat HAA tilshisi.
Qandy oqıǵa Shymkenttiń irgesindegi eldimekenderdiń birinde bolǵan. Eki kúdikti jolǵa shyǵyp, jolaýshy tasymaldaýmen aınalysyp júrgen A. degen azamatty toqtatady. Odan oblys ortalyǵyna jetkizip tastaýyn ótingen. Sóıtip, jol boıynda ózderiniń qylmystyq áreketterin júzege asyrypty. Kisi óltirýge aldyn ala daıyndalyp kelgender kólik júrgizýshisin toqtaýyn suraǵan. Jamandyq oılamaǵan kólik ıesi joldyń shetine toqtapty. Sol mezette jolaýshylardyń biri ózimen birge alyp kelgen jipti kólik júrgizýshiniń moıynan tuzaq retinde salyp, qylqyndyrady. Al, onyń sybaılasy K. qaltasyndaǵy taspen kólik júrgizýshisin basynan birneshe ret urǵan. Osy soqqylardan taksı júrgizýshisi esinen tanyp qalǵan ýaqytta, sońǵynyń qaltasynan qomaqty aqsha men uıaly telefonyn alyp qoıǵan.
Aram oıyn júzege asyrǵandar artynan oqıǵa bolǵan jerden boı tasalaǵan. Alaıda júrgizýshiniń ólimine kináli ekeý kóp uzamaı qolǵa tústi. Jarty jylǵa jýyq ýaqytqa sozylǵan tergeý barysynda olardyń qylmystary tolyǵymen dálelin taýyp, aıǵaqty zattar tárkilendi.
«Ońtústik Qazaqstan oblysynyń qylmystyq ister jónindegi mamandandyrylǵan aýdanaralyq soty eki aıyptalýshyny Qazaqstan Respýblıkasy Qylmystyq kodeksiniń 192-baby 2-bóligimen jáne 24-babynyń 3-bóligi arqyly 99-babynyń 2-bóliginiń 7),8)-tarmaqtarynda qarastyrylǵan qylmys belgilerimen kináli dep tapty. Olardyń árqaısysy 12 jyl merzimge bas bostandyǵynan aıyrý jazasyna sottaldy. Jazalaryn qatań tártiptegi kolonııada óteý belgilendi»,- deıdi sotqa qatysqan Ońtústik Qazaqstan oblystyq prokýratýrasynyń prokýrory Qanat Júnisov.
