Shymkentte taǵy bir kishkentaı baladan Kavasakı sındromy tabyldy
Bul jaıynda Shymkent qalasy ákimdiginiń baspasóz qyzmeti málim etti.
Densaýlyǵy syr bergen balaqaıdy dárigerler jansaqtaý bóilimne shuǵyl jatqyzyp, tekserý júrgizgen.
Naýqas baladan alynǵan synama nátıjesinde kavasakı tárizdes sındrom anyqtalǵan.
Qaýipti indet anyqtalǵan balaqaıdyń jaǵdaıy alǵashqy úsh kúnde nasharlap ketken.
«Tek tórtinshi táýlikte ǵana naýqas balanyń densaýlyq jaǵdaıy turaqtalǵan» dep habarlaıdy densaýlyq saqtaý basqarmasy.
Emdeý sharalarymen qatar mamandar ınfektsııaǵa shaldyqqan balanyń aǵzasyndaǵy ózgeristerdi der kezinde anyqtap, ómirine tóngen qaýipti aldyn alǵan.
Ata-anasynyń sózinshe, balasynda aýrýdyń alǵashqy belgileri baıqalǵanda, jekemenshik klınıkada em alǵan.
Balada aýrý belgileri basylǵan soń úıdegi úlkender syrqatyna mán bermepti. Alaıda araǵa bir apta salyp, balanyń jaǵdaıy kúrt nasharlap, jansaqtaý bóliminen bir-aq shyqty.
«Bul - bıyl tirkelgen kavasakı tárizdes mýltıjúıeli qabyný sındromyna shaldyǵýdyń ekinshi jaǵdaıy. Al byltyr kavasakı tárizdes mýltıjúıeli qabyný sındromy tórt baladan anyqtalǵan»,-deıdi qalalyq klınıkalyq balalar aýrýhanasynyń bas dárigeri Dınara Jýmadılova.
Medıtsına mamandary balanyń dene qyzýy 38,5-ten joǵary bolsa, ish aýyrýy, qusý, júrek aınýy, denedegi bórtpe daq, jótel paıda bolsa, mindetti túrde dáriger shaqyrtý qajettigin eskertedi.
Óıtkeni, bular – kavasakı tárizdes mýltıjúıeli qabyný sındromynyń belgileri.
Der kezinde dárigerge kórinbese, sońy qaıǵyly jaǵdaıǵa alyp kelýi de yqtımal.
Óıtkeni, aýrý júrek pen ókpe, asqazan, ishek joly nemese júıke júıesi sekildi aǵzanyń birneshe júıesin birden zaqymdaıdy.
Atalmysh aýrýdyń aldyn alý úshin eresekter balany koronavırýstan saqtaýǵa kúsh salýy kerek.
Onyń birden bir joly – vaktsına saldyrý. Sondyqtan dárigerler ár adam óz otbasyn qorǵaý maqsatynda ekpe saldyrýynyń mańyzy zor ekenin taǵy da atap ótti.
