Shymkentte sýıtsıd jasaǵan zeınetkerge qatysty tyń derekter belgili boldy
Shymkentte 72 jastaǵy qarııa aýrýhananyń úshinshi qabatynan sekirip, kóz jumǵany týraly jazǵan bolatynbyz. Qaıǵyly oqıǵa 18 mamyr kúni túngi saǵat 23:15 shamasynda bolǵan. Egde jastaǵy er adam 7 mamyr kúni №2 qalalyq aýrýhanaǵa «keńirdegin kesý» arqyly sýıtsıd jasaý deregimen túsken eken. Degenmen, onda hırýrgtardyń bolmaýyna baılanysty №1 aýrýhanaǵa aýystyrylǵan.
Naýqastyń jaǵdaıyna baılanysty kómeıin tigý úshin jedel ota jasalyp, 10 mamyrǵa deıin jansaqtaý bóliminde jatqan. Óz-ózine qol jumsaý faktisi bolǵan soń, oǵan psıhologııalyq kómek kórsetilip, týystary shaqyrylǵan.
Alaıda, 18 mamyr kúni týystary beligisiz sebeptermen aýrýhanadan ketip qalǵan. Dárigerler marqumnyń sýıtsıd jasaýyna «ózin jalǵyz qaldym dep sezinýi» yqpal etýi múmkin degen pikir aıtyp otyr. Al 72 jastaǵy qarııa basynan alǵan aýyr jaraqattardan oqıǵa ornynda kóz jumǵan.
«Bas mıynyń shaıqalýy, bas mıy súıeginiń synýy sekildi aýyr jaraqattar bolǵan. Negizi týysqandary qasynda otyrǵandyqtan, qanshama kún mundaı jaǵdaı bolmaǵan, endi týysqandary ketip qalǵannan keıin «meni tastap ketti» dep oılap, osyndaı qadamǵa bardy dep paıymdap otyrmyz. Óıtkeni bizdiń №1 qalalyq aýrýhananyń hırýrgııalyq bóliminde óte joǵary deńgeıde kómeıi tigilip, birinshi hırýrgııalyq óńdeý jasalyp, jansaqtaý bólimine jatqyzylyp, birinshi joǵary medıtsınalyq qyzmet kórsetkenbiz», - deıdi №1 qalalyq klınıkalyq aýrýhananyń ádistemelik bólim basshysy Qýanysh Lekerov.
