Shymkentte sý astynda qalǵan 5 úı qaıta salynady
Búgin qala ákiminiń orynbasary Baýyrjan Mamytalıev atalǵan eldi meken turǵyndarymen kezdesti.
«Áleýmettik qordan búgingi tańda tıisti qarajat bólindi. Osy aptanyń sońynda qurylys jumystary bastalady. Qurylys kompanııalaryna úılerdi bir jarym aıda aıaqtaýdy aıttyq. Budan bólek, sý basqan 32 úıdiń zaqymdanǵany týraly komıssııa sheshim shyǵaratyn bolsa, áleýmettik qordan qalpyna keltirý jumystaryna tıisti qarajat bólýdi qarastyramyz»,- dedi B.Mamytalıev.
Sondaı-aq, qala ákiminiń orynbasary sý kirgen aýlalar men kóshelerdi tazartý jumystarynyń barysyn tekserdi.
Eńbekshi aýdanynyń Eltaı turǵyn alabynda qazirgi tańda sý tolyǵymen toqtalyp, apattyq-qalpyna keltirý jumystary qarqyndy júrgizilip jatyr. Oǵan Shymkent qalalyq Tótenshe jaǵdaılar departamentiniń jeke quramynan 48 adam, 3 tehnıka jáne 1 motopompa jumyldyryldy.
«Órt sóndirý bólimderiniń jeke quramy sý basqan aýla-aýmaqtardan, kóshelerden laı men tastardy shyǵaryp, aryqtardy jınalǵan qoqystardan tazartýda. Sondaı-aq olar búginge deıin uzyndyǵy 30 metr bolatyn eki kóshe men 48 úıdiń aýlasyn laıdan tazartty», - dedi Shymkent qalasy ákiminiń baspasóz qyzmetinen.
