Shymkentte stýdenttiń ólimine qatysy bar degen kúdikpen eki adam ustaldy
Qalalyq polıtsııa departamentiniń málimetinshe, qazir kúdiktilerge qatysty Qylmystyq kodekstiń 106-baby «Densaýlyqqa qasaqana aýyr zııan keltirý» boıynsha tergeý júrgizilip jatyr.
Kolledj jataqhanasynda qaza tapqan stýdent Nurhat Dúısenniń týystary onyń ólimine álimjettik sebep bolýy múmkin dep otyr. Aıtýlarynsha, marqum oqýǵa túskeli jıi aqsha suraǵan. Jastar arasyndaǵy janjal osydan týyndaǵan shyǵar dep topshylaıdy.
«Nurhat oqýǵa túskeli bárinen qaryzǵa aqsha suraı bastaǵan. Týystarynan, ápkelerinen suraǵan. Endi olardyń bári «qınalyp jatyr» dep bere bergen. Biraq, bul aqsha qaı jaqqa ketip jatqanyn bilmeıdi. Múmkin tamaq, ózine tátti nárseler alyp jegen shyǵar dep. Budan aqsha talap etken dep oılaımyz. Qorqytqan. Ony bizge aıtýǵa bul qoryqqan», - deıdi anasy Aıjan Qashaǵanova.
Baqılyq bolǵan stýdent otbasynda tórt qyzdyń ishindegi jalǵyz ul bolǵan edi. Densaýlyǵynda kinárat bolmapty. Qalalyq bilim basqarmasynyń basshysy osy jaǵdaıǵa baılanysty qazir zerdeleý jumystary júrip jatyr deıdi.
«Jaýapty qyzmetkerlerdiń óz ornynda bolǵan bolmaǵany jóninde basqarmanyń tarapynan zerdeleý jumystary júrgizilip jatyr. Eger bolmaǵan bolatyn bolsa, óz isine jaýapkershilikpen qaramaǵany úshin birinshi basshy qatań jaýapkershilikke, jumys ornyn bosatqanǵa deıingi qatań jaýapkershilikke tartylatyn bolady», - deıdi basqarma basshysy Janat Tájıeva.
Aıta keteıik, Manap Ótebaev atyndaǵy Joǵary jańa tehnologııalar kolledjiniń birinshi kýrs stýdenti jataqhanada kóz jumdy. Soqqy alǵan jasóspirim jedel járdem qyzmeti jetkenshe jan tásilim etken bolatyn.