Shymkentte stýdenttik jańa jataqhana paıdalanýǵa berildi
350 orynǵa arnalǵan stýdentter úıi QR Tuńǵysh Prezıdenti N.Nazarbaevtyń Bes áleýmettik bastamasy aıasynda boı kóterdi. Onyń ashylýyna arnalǵan saltanatty sharaǵa QR Parlamenti Májilisiniń depýtaty Erjan Qudaıbergen, Shymkent qalasynyń ákimi Ǵabıdolla Ábdirahymov, QR Bilim jáne ǵylym mınıstrliginiń «Qarjy ortalyǵy» AQ prezıdenti Asqar Ibraımov, Ońtústik Qazaqstan memlekettik pedagogıkalyq ýnıversıtetiniń rektory Ońalbaı Aıashev qatysty.
Mınıstrliktiń aqparatyna sáıkes, el óńirlerinde jańadan salynǵan jataqhanalar paıdalanýǵa berilgennen keıin jyl saıyn ár eńgizilgen tósek orynǵa 8 jyl boıy memlekettik tapsyrys ornalastyrylyp otyrady (rekonstrýktsııa - jylyna 47 AEK, jańa qurylys - jylyna 122 AEK).
«2019 jylǵy 1 sáýirindegi málimetke sáıkes 20 kelisimshart jasaldy. Onyń sheńberinde 2019-2022 jyldar aralyǵynda 6 864 tósek oryndy iske qosý josparlanyp otyr. Onyń 13-i Nur-Sultan, Almaty, Shymkent, Qaraǵandy, Qostanaı qalalarynda - qurylys boıynsha, al jeteýi Shymkent, Aqtaý, Pavlodar, Óskemen, Taraz, Oral qalalarynda rekonstrýktsııa boıynsha», - delingen Bilim jáne ǵylym mınıstrliginiń aqparatynda.
