Shymkentte stend atýdan sporttyq oıyndar bastaldy
ShYMKENT. QazAqparat - Shymkentte stend atýdan respýblıkalyq ІV jastar sporttyq oıyndary bastaldy. Halyqaralyq týrnırdiń ashylý saltanatyna Qyzylorda, Mańǵystaý, Astana jáne Almaty qalalarynan kelgen 100-den astam jas sportshy qatysty, dep habarlaıdy QazAqparat HAA tilshisi.
Sporttyq shara 15 jastan joǵary jastar men eresekter arasynda ótýde. Atqyshtar eki jattyǵý - dóńgelek stend jáne kompakt-sportıng boıynsha baq synasady. Jarysta XVII Jazǵy Azııa oıyndarynda top jarǵan Anastasııa Davydova, Marııa Dmıtrıenko, Oksana Sereda jáne Andreı Mogılevskııler óz mergendikterin tanytýda.
«Alda 2018 jyly Azııa oıyndary ótedi. Djakartada ótetin oıynǵa myqty degen sportshylardy daıyndaý maqsatymyz bar. Bıylǵy jyly tamyz aıynda «EKSPO-2017» jarysy ótedi. Ol jerde VII Azııa chempıonaty bolady. Onda jastar, jasóspirimder jáne eresekter arasynan myqtylardy iriktep alamyz. Búgingi kúnniń ózinde sportshylardyń daıyndyǵy joǵary dep aıtýǵa bolady»,-deıdi respýblıkalyq atý sportynan olımpıadalyq daıarlaý ortalyǵy dırektorynyń orynbasary Asan Áýeshanov.
Aıta keteıik, dúbirli doda stend atý sportyn nasıhattaý jáne azamattyq qarýǵa degen qyzyǵýshylyqty kóterý maqsatynda uıymdastyrylyp otyr. Sport ardagerleri izderinen ergen jas mergenderge tegis uńǵyly myltyqtan atýdy úıretip, óz tájirıbelerimen bólisti. Qazirgi tańda nysana kózdeýshilerdiń qatary sırek bolǵandyqtan, elimizde bul sport túrin meılinshe damytý isi qarqyn alǵan. Al, baıraqty báseke maýsymnyń 5-ine deıin ótedi dep kútilýde. Ozyp shyqqan sportshylar respýblıkanyń qurama komandasynda oıyn kórsetetin bolady.
