Shymkentte stend atý boıynsha el kýboginiń birinshi kezeńi aıaqtaldy
ShYMKENT. QazAqparat - Shymkentte stend atý boıynsha el kýboginiń birinshi kezeńi aıaqtaldy. Mergender dodasyna Astana, Almaty qalalarymen qatar, Qyzylorda, Qostanaı, Mańǵystaý, Pavlodar, Ońtústik Qazaqstan oblystarynan 80-ge tarta sportshy qatysty, dep habarlaıdy QazAqparat HAA tilshisi.
Jarysqa qatysýshylar birneshe sanat boıynsha baq synasty. Erler men áıelder, jasóspirimder men qyzdar arasynda birneshe baǵyttaǵy saıys qyzý tartyspen órbidi. Jarys qorytyndysy boıynsha atýdyń skıt túrinen Ońtústik Qazaqstannyń týmasy Vladıslav Mýhamedıev pen almatylyq Ásem Orynbaılar óz sanattary boıynsha birinshi oryndy ıelendi. Atýdyń trap túrinen ońtústikqazaqstandyq Vıktor Hasıanov, áıelder arasynan Marııa Dmıtrenko bas júldeni qanjyǵasyna baılady. Al, dýbl traptan qyzylordalyq Maksım Kolomets, áıelder arasynan qyzylordalyq Aıjan Dosmaǵambetova myqtylyq tanytty. Sondaı-aq, kompakt-sportıngten ońtústikqazaqstandyq Vladıslav Mýhamedıev, áıelder arasynan Anastasııa Molchanova birinshi oryn tuǵyrynan kórindi.
Osylaısha, jarystyń jalpy qorytyndysy boıynsha kúngeılik sportshylar júldeli 1-shi oryndy jeńip aldy. Al, almatylyqtar 2-shi tuǵyrdan kórindi. Úzdikti úshtikti qyzylordalyqtar túıindedi.
Jarysty uıymdastyrýshylar saıys arqasynda stend atýdan el mergenderin anyqtaýdy kózdeıdi.
