Shymkentte statsıonarda em alyp jatqandar sany 56,9 paıyzǵa tómendedi
Murat Áıtenovtiń aıtýynsha, shaharda koronavırýs ınfektsııasynyń taralý qarqyny báseńdeı bastaǵan.
«Osy aıdyń basyndaǵy kórsetkishtermen salystyrǵanda koronavırýs juqtyrǵandardyń sany eki esege tómendegen. Sonymen qatar, jedel járdem shaqyrtý 43 paıyzǵa azaıyp, jaǵdaı turaqtala bastady», -dedi qala basshysy.
Qala qoımalarynda bir aılyq dári qory jasaqtalǵan.
«Búginde shet memleketten 2 mln 676 myń flakon birinshi kezektegi dáriler men 16 mln 700 myń maska jetkizildi. Sondaı-aq, qosymsha 58 ókpeni jasandy jeldetý apparaty, 250 «Bobrov» tynys alý apparaty jáne 26 reanımatsııalyq monıtorlar alyndy. Qazirgi tańda, reanımatsııalyq orynnyń 88,7 paıyzy ÓJJ apparattarymen qamtylyp otyr», - dedi ákim
Sonymen qatar, Murat Áıtenov tótenshe jaǵdaıǵa oraı tabysynan aıyrylǵan azamattarǵa tıesili 42500 teńge kólemindegi birjolǵy tólem Shymkent qalasynyń 100 504 azamatyna berilgenin atap ótti.
Eske sala ketsek, keshe oblys ákimderi Memleket basshysy Qasym-Jomart Toqaevqa elimizdiń óńirlerindegi jaǵdaı týraly baıandaǵan bolatyn. Sonyń ishinde Shymkent qalasynyń ákimi qazirgi sanıtarlyq-epıdemıologııalyq jaǵdaı, koronavırýs indetiniń taralýyna jol bermeý, sondaı-aq karantın rejımin qamtamasyz etý jáne áleýmettik kómekke muqtaj turǵyndarǵa qoldaý kórsetý maqsatynda qabyldanyp jatqan sharalardy tolyqqandy baıandap shyqty. Telefon arqyly sóılesý barysynda Prezıdent ahýaldy qatań baqylaýda ustap, atalǵan mindetke basym baǵyt retinde mán berýdi tapsyrdy. Bul rette karantın sharalaryn saqtaýdyń mańyzdy ekeni jáne halyqqa túsindirý jumystaryn belsendi túrde júrgize berý kerektigin aıtty.