Shymkentte sport kesheninde ashylǵan provızorly ortalyqqa dárigerler kerek
Shymkent qalasynyń ákimi Murat Áıtenovtiń tapsyrmasyna sáıkes, sport kesheninen qosymsha ashylǵan kúndizgi statsıonar 450 orynǵa daıyndalýda. Ortalyqta JRVI jáne pnevmonııa juqtyrǵan naýqastar em qabyldaıtyn bolady. Mundaǵy kereýetter ýnıversıtettiń jataqhanasy men demeýshiler esebinen jetkizilgen.
«1 shildede ashylatyn ortalyqqa kúndizgi statsıonarǵa 50 dáriger, 75 meıirbıke, 20 sanıtar qyzmetkeri qajet bolady. Sport keshenindegi jumysty úılestirýge qaladaǵy №5 emhana ujymy jumyldyrylady. Statsıonar tańǵy 8-den keshki 20.00-ge deıin jumys isteıdi» delingen habarlamada.
Aıta keteıik, buǵan deıin qalada JRVI juqtyrǵandar sany 2 esege, pnevmonııamen aýyrǵandar sany 6 esege kóbeıgenin habarlaǵan bolatynbyz. Osyǵan oraı, qaladaǵy Samal-3 shaǵyn aýdanynda jańa mektepten - 400 oryndyq, Polıtehnıkalyq kolledjinen - 400 oryn, UOS ardagerleri ortalyǵynan 100 oryndyq provızorly oryndar ashylǵan edi. Sondaı-aq, turǵyndarǵa kómektesetin «iKomek» ortalyǵy ashyldy. Jedel jelide kúndiz-túni turǵyndardyń qońyraýlaryna jaýap beriledi.
«109 nómirine qońyraý shalǵandar qazirgi epıdemıologııalyq jaǵdaıǵa baılanysty saýaldaryna jyldam jaýap ala alady. Ortalyq táýligine 3000 qońyraý qabyldaýǵa qaýqarly. Qajet bolǵan jaǵdaıda 5000 azamatqa deıin qyzmet kórsete alady. Ol úshin 26 qyzmetker táýlik boıyna jumys jasaýda. iKomek ortalyǵy barlyq emhanalarmen yńǵaılastyrylyp aqparattandyrylǵan. Sonymen qatar iKomek ortalyǵynyń 87777109109 vatsap nómiri de turǵyndar úshin táýlik boıyna qyzmet etedi» delingen ákimdiktiń habarlamasynda.
