Shymkentte sottalǵan nıgerııalyqtarǵa qatysty úkim ózgertilmedi
ShYMKENT. QazAqparat - Shymkentte jalǵan aqshamen alaıaqtyq jasamaq bolǵan nıgerııalyqtarǵa qatysty sot úkimi kúshinde qaldy. Oblystyq sottyń qylmystyq ister jónindegi apellıatsııalyq alqasy Ál-Farabı aýdandyq sotynyń úkimin ózgerissiz qaldyrdy, dep habarlaıdy QazAqparat HAA tilshisi.
Aıta keteıik, Nıgerııa Respýblıkasy azamattary Obah Jozefat pen Nvoke Ekendırıchýk 2016 jyldyń qyrkúıek aıynda jalǵan aqshamen alaıaqtyq jasaý kezinde ustalǵan bolatyn. Tergeý barysynda olardyń Shymkent qalasynyń turǵyny «A» degen azamatpen tanysyp, oǵan ınvestıtsııalyq jobalar bolsa kólemdi qarajat quıatynyna sendirgen. Sóıtip, ınvestıtsııalyq jobaǵa quıatyn 8 mln. AQSh dollaryn keden organdarynan baıqaýsyz alyp ótý úshin qara boıaýǵa boıalǵanyn, ony kádimgi dollarǵa aınaldyrý úshin naǵyz AQSh dollary qajet ekendigin aıtqan. Keıinnen jábirlenýshiniń senimine kirip, sońǵynyń 16 myń AQSh dollaryn aldap alýǵa oqtalýy barysynda quqyq qorǵaý organdarymen ustalǵan bolatyn. 
Jasaǵan qylmystary úshin olardyń ústinen QK-tiń 24 baby 3 bóligi arqyly, 190 baby 4 bóliginiń 2 tarmaǵymen is qozǵalyp, Ál-Farabı aýdandyq soty qos sheteldikti 3 jyl 9 aıǵa bas bostandyǵynan aıyrǵan. Alaıda keıinnen Raqymshylyq zańyna sáıkes olardyń jazalary birshama jeńildetilgen. Soǵan qaramastan nıgerııalyqtar oblystyq sottyń appelıatsııalyq alqasyna shaǵym túsirip, úkimdi qaıta qaraýdy suraǵan edi.
