Shymkentte soqqan daýyl úsh shyrshany qulatty
ShYMKENT. QazAqparat - Shymkentte túnde quıyndatyp soqqan jel Jańa jylǵa arnap bezendirilgen úsh shyrshany qulatyp ketti, dep habarlaıdy «QazAqparat» HAA tilshisi oblystyq TJD-nyń baspasóz qyzmetine silteme jasap.
«21 m/s ekpinmen soqqan jelden ál-Farabı alańyndaǵy, Sh.Qaldaıaqov alleıasyndaǵy jáne oblys ákimdigi ǵımaratynyń aldyndaǵy shyrshalar qulady. Aqparat qala ákimdiginiń kezekshisine berildi», - delingen habarlamada. Qazir qalalyq turǵyn úı-kommýnaldyq sharýashylyq qyzmeti jańajyldyq shyrshalardy qalpyna keltirip jatyr.
Daýyl Ońtústik Qazaqstan oblystyq Tótenshe jaǵdaılar departamenti ǵımaratynyń da 288 sharshy metrlik shatyryn ushyryp, Temirlan tas joly men Arǵynbekov kóshesindegi elektr baǵandaryn qulatyp ketken. Zardap shekkender joq.
