Shymkentte snarıad jarylyp, 2 adam zardap shekti

ASTANA. QazAqparat - Shymkentte artıllerııalyq snarıad jarylyp, 2 adam zardap shekti. Bul týraly QR ІІM Іshki jáne syrtqy kommýnıkatsııalar departamentiniń dırektory Almas Sadýbaev aıtty, dep habarlaıdy QazAqparat tilshisi.

«11 aqpan kúni Shymkent qalasynyń eki turǵyny eski úlgidegi artıllerııalyq snarıadtyń jarylýy saldarynan túrli deńgeıdegi dene jaraqatyn aldy. Jarylys eki turǵynnyń biriniń snarıadty aramen kesýinen oryn alǵan. Olar ony metall qabyldaý ornyna ótkizbek bolǵan, - dedi ol.

Departament basshysynyń aıtýynsha, Shymkent qalalyq polıtsııa jáne tótenshe jaǵdaılar departamentteri, sonymen qatar ózge de memlekettik organdardyń mamandary men qyzmetkerlerinen jasaqtalǵan jedel tergeý toby jarylys ornyn qaraý barysynda dál sondaı artıllerııalyq snarıadtardy tapqan.

«Zardap shegýshilerdiń týystarynyń aıtýynsha, oq-dáriler tún ishinde Arys qalasynan metall retinde ótkizý úshin ákelingen. Qazirgi ýaqytta oq-dárilerdiń qaıdan alynǵanyn anyqtaý sharalary júrgizilip jatyr. QR Qylmystyq kodeksiniń 287- babynda qarastyrylǵan qylmys belgileri boıynsha sotqa deıingi tergeý amaldary júrgizilýde», - dedi Almas Sadýbaev.