Shymkentte shólmektegi aýyz sýdyń baǵasy 12,9 paıyzǵa qymbattaǵan

ASTANA. QazAqparat - Qazaqstanda úsh maýsymnyń qorytyndysy boıynsha alkogolsiz sýsyndar men mıneraldy sý óndirisi 7 paıyzǵa ósken, dep habarlaıdy «QazAqparat» HAA Energyprom.kz-ke silteme jasap.

2018 jylǵy qańtar-qyrkúıek aralyǵynda qazaqstandyq kompanııalar 989,3 mln lıtr mıneraldy jáne gazdalǵan sýsyn shyǵarǵan. Bul byltyrǵy jylǵa qaraǵanda 6,4 paıyzǵa kóp.

Basqa alkogolsiz sýsyndar óndirisi de ósti - úsh maýsymda 449 mln lıtr (bir jylda 6,7%) shyǵarylǵan.  

Aýyz sý óndirisi 2016 jyldan beri ósip keledi. Basqa alkogolsiz sýsyndar sektorynda 2016 jyly quldyraý baıqalsa, 2017 jyldyń qorytyndysy boıynsha sala qaıtadan ósimge shyqty.

2018 jyldyń qazan aıyna qaraı Qazaqstanda bótelkedegi sýdyń bir lıtriniń baǵasy orta eseppen alǵanda 80,9 teńge boldy, bul 2017 jyldyń qyrkúıek aıymen salystyrǵanda 4,8 paıyz kóp.

Elimizdegi iri qalalar arasynda aýyz sýǵa eń qymbat baǵa Almaty qalasynda (bir lıtr úshin 92 teńge, jylyna +5,7 paıyz), Tarazda (bir lıtri 89 teńge, jylyna +6 paıyz) jáne Atyraýda (bir lıtri 88 teńge, jylyna +4,8 paıyz) tirkelgen.

Baǵa ósimi ásirese Shymkentte qatty baıqalǵan - birden 12,9 paıyzǵa artty. Salystyrmaly túrde, Taldyqorǵanda jyldyq baǵa ózgergen joq (bir lıtr úshin - 78 teńge).

Eń arzan aýyz sý Oral qalasynda (bir lıtri 58 teńge, jylyna +5,5 paıyz), Qaraǵandyda (bir lıtri 62 teńge, jylyna +3,3 paıyz) jáne Jezqazǵanda (bir lıtri 69 teńge, jylyna +1,5 paıyz).